Bantu ngagai Dun Katibas dirumban

SONG: Kena Hari Tiga tu tadi, bisi 155 tungkus pemakai udah disua ba sitak Parlimen P215 Kapit (Dun Katibas) ba Balai Mayuh Guna Song.

Menteri Dagang Dalam Menua enggau Pekara Penguna (KPNDHEP) Datuk Alexander Nanta Linggi ti mega Kaban Parlimen Kapit madah, pengawa nyuaka bantu pemakai nya kerejasama entara ejensi perintah enggau Palan Servis Pengari Rayat Parlimen P215 Kapit ungkup Dun Katibas.

“Bantu pemakai nya pemeri ari Perintah Besai ungkup sitak Parlimen enggau inisiatif nya dikena ngelempungka tating penusah rayat sekumbang Atur Tagang Pejalai (PKP) tu,” ku iya meri penerang, Hari Tiga tu tadi.

Nanta madah, pengawa nganjung bantu pemakai tu deka dipejalai jampat agi laban piak pemekal madahka bantu nya chukup disuaka ngagai komuniti.

Ku iya, sebedau tu piak pemekal napi penanggul ari sukut perengka pengangkut dikena mai bantu nya ari Sibu ngagai Song.

“Nya alai, kami ngarapka semua piak besabar enggau meri kerejasama laban nadai siku kitai deka dikelaung ari nerima bantu tu.

“Nambahka nya, anang mudah ngerembaika berita bula enggau semampai berandau enggau ejensi perintah baka piak Opis Pelilih Song ngambi nemu penerang ti betul,” tandu iya.

Bantu nya udah disuaka Kaunsilor Lidam Assan ngarika Palan Servis Pengari Rayat Parlimen P215 Kapit.

Suara Sarawak