Bantu terus dianjung ke rumah panjai

SARATOK: Bekal bantu renggat keterubah ungkup 4,000 pintu bilik ba sitak Dun Krian udah berengkah diagih sehari tu.

Adun Krian, Ali Biju, madahka utai bantu baka berau enggau pemakai bukai udah digumpul ba Rumah Dayak Saratok sebedau disadung ngagai bala penerima.

Ku iya, genap Dun udah diagihka belanja penyampau RM200,000 dikena nyendiaka bantu nya lalu semua pengawa tu deka diatur Palan Servis Dun sida empu nentuka nadai siku rayat deka dikelaung.

Ambika semua nemu, bantu ungkup sitak Dun Kalaka enggau Dun Kabong deka diberi nengah Palan Servis Dun sida empu laban bela nerima penyampau agih belanja ke sama.

“Ungkup Dun Krian, bantu deka dianjung terus ngagai peranak rumah panjai, ukai semina naka pala tangga aja tang terus datai ba mua pintu.

“Taja pia, bantu tu deka diberi berenggat berindik ari bisi tatak ba penyampau tubuh sida ke gawa nganjung bantu nya.

“Kitai meretika Atur Tagang Pejalai (PKP) dipejalaika perintah lalu deka seruran meri kerejasama sereta nitihka jaku tangkan piak bekuasa nentuka pengawa dipejalai likun,” ku Kaban Parlimen Saratok madah nyemetak.

Kelimpah ari bantu pemakai baka berau, minyak makai, tepung, budu, mi, bihun, gula enggau susu dalam tin, bantu susu ungkup nembiak mit beumur enam taun enggau biak agi mega bisi disedia.

Suara Sarawak