Bantu tumu udah dianjung ngagai orang tasah angus ba Lot Wawasan Kampung Melango

SARATOK: Sepuluh iku diri sebilik ke tasah angus rumah pagi tadi udah nerima bantu.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Datuk Ali Biju ngarapka bantu diberi ulih nyaup ngelempungka mimit tating belanja sida ke tasah nya.

“Sinu ati ninga berita bala kita ti udah dituntung penusah karam di darat pagi tu tadi.

“Aku meretika penusah kita sebilik laban penusah baka tu endang enda ulih disadang kitai lalu tau nyadi sebarang maya, enda milih sapa.

“Nya alai aku ngarapka bala kita ulih sabar enggau liat ati napi penguji besai tu kelebih agi maya bulan Ramadan lalu enda lama agi ngintu Hari Raya,” ku iya ti mega Adun Krian.

Jaku Ali nya dikenataika pengari iya, Mohd Faiz Wahi lebuh nganjung bantu seraya ngabas sida Yusof Suni sebilik ba Lot Wawasan Kampung Melango ditu tadi.

Sama datai Penghulu Kampung Hilir, Razali, Tuai Kampung Pagan, Abdul Rahman enggau Tuai Kampung Lot Wawasan, Saraie sereta bala bukai.

Ke penerang, rumah nya diuan tiga iku lelaki besai tuai enggau enam indu besai tuai sereta siku nembiak lelaku Orang Nyelai Pendiau (OKU).

Suara Sarawak