MIRI: Inisiatif Bas Pintar Miri terus ditegap nengah ngatur Program Narak Pengeleda enggau Peneleba Nepan Bas Pintar ngaul nembiak sekula dikena nyeridi rebak biak senentang pemesai guna ngena perengka pengangkut mensia mayuh.
Menteri Pengangkut Sarawak, Datuk Seri Lee Kim Shin madah, program diatur Opis Menteri Pengangkut Sarawak (MOTS) nya meri peneleba tumu ngagai nembiak bekaul sistem perengka pengangkut mengeri ti moden enggau efisyen agi.
“Sebedau tu, semua nembiak enda kala nepan bas pintar pechuma.
“Nya kebuah, peneleba tu chukup besai reti lalu dikearap ulih meri pengeleda sida bekaul pemesai guna ngena pengangkut mensia mayuh,” ku iya lebuh ngulu program nya di Sekula Sekondari (SMK) Lopeng, Hari Satu tu tadi.
Ku iya, diatu mensia mayuh ulih meda endur bas pintar pechuma jam nyata nengah aplikasyen telefon pintar lalu ngemuntang perambu pejalai ninting hari.
Ku iya baru, bas pintar nya disikap mayuh fasiliti mode nyengkaum dalam bas ti lantang sereta disikap kamera litar tertutup (CCTV) dikena nyamin pengelikun penumpang.
Ku Kim Shin, program nya inisiatif beguna narak ulah ngena perengka pengangkut mensia mayuh kenyau ari umur biak kelimpah nempa pengandal ngagai sistem mobiliti mengeri ti moden enggau efisyen agi.
Sepanjai program, bala nembiak mega diterang enggau penerang bekaul operasyen Bas Pintar Miri nyengkaum chara merambu pejalai enggau ngulihka penerang jam nyata nengah Aplikasyen Pengangkut Pintar Sarawak (SSTA).
Bala nembiak mega diterang bekaul aplikasyen nya ti nentuka penguna berati ke pejalai bas, taga pejalai sereta ngemaru servis lalu ngemuntang mobiliti ninting hari di mengeri tu.
Nambah ke nya, iya madah ke program baka tu deka dikerembai ngagai sekula bukai di pelilih Miri dikena nambah pengeleda bekaul pemesai guna perengka pengangkut mensia mayuh lalu nyaup mutar penanggul jalai sekut di mengeri Miri.
Iya mega merambu nembiak bekunsi penerang bekaul servis bas pintar pechuma ngagai apai indai sida.
“Maya ujung minggu, apai indai ulih engkah entukar semak stesyen bas lalu begulai ngirup pagi enggau anak sida nepan bas nuju pasar sebedau pulai baru ngena bas ti sama. “Tu mega ngerapit kaul diri sebilik,” ku iya nyemetak. – EDISI UKAS
