KUALA LUMPUR: Sitak Batang Lupar endang sebuah sitak ke pemadu engkeman nyadi palan pemansut pemakai ngagai Malaysia.
Kaban Parlimen Batang Lupar Datuk Seri Rohani Abdul Karim madah, sitak nya ngembuan penau dikemansang enggau pengawa betanam padi dandang besai, mansutka pemakai injin, berikan enggau mayuh bansa buah baka nanas, pisang, nyiur enggau rian.
Kenu ku iya, November taun nyin kemari sekeda sitak ba Batang Lupar iya nya di Rumah Brodie (L4PL2) enggau Kampung Bundong (R5PL1) udah diinjin nengah pengawa nanam benih padi variety MR269 nyadi pemungkal Projek Nanam Padi Dandang Besai Padi Batang Lupar.
“Pengawa nanam benih padi ba sitak nya mungkur tanah 24.22 hektar pemesai deka diketau enda lama agi,” ku iya maya Bejaku Perintah Diraja Parlimen Ke-14 Penggal Kedua Aum Parlimen ditu, kemari.
Ku Rohani, lima agi sitak urung 42.1 hektar pemesai agi ba renggat nanam, nyengkaum Kampung Bundong enggau Rumah Rokiah (R5PL2), Rumah Brodie (R4PL2, R4PL3), Rumah Jiram (L2PL3), Rumah Entrie enggau Rumah Agong (R1PL1) sereta Kampung Melayu Tanjung Bijat (R1PL2).
“Pengawa nanam padi varieti moden musim keterubah tu mungkur 295 orang bumai nguna 204 lot padi paya urung 66.32 hektar,” ku iya seraya madah Umai Padi Batang Lupar betuju nentuka bekal padi/berau menua tu enda suntuk tauka abis nyema penanggul berau nyadi baru baka sebedau tu.
Nya alai, iya ngarap perintah besai ulih nerus enggau beratika projek Bumai Padi kelimpah fokus ngagai Tibang Pemakai.
