NYERUMBA musin undang galah, Sungai Tellian nyaru diatu, dia menua ti urung satu kilometer penyauh ari Pasar Mukah seruran ditapatka bala sida ti rinduka pengawa nginti.

ASIL SUNGAI

Sungai Tellian sebengkah sungai pemadu panjai ba Pelilih Mukah ti chukup lantang sereta beresi ngembuan mayuh utai idup dalam ai baka undang galah enggau macham bansa ikan sungai.

Nya kebuah Sungai Tellian semampai richah laban suah ditapatka bala pengusung sekalika peranak dia empu tauka pengusung ari luar Mukah ti rinduka pengawa nginti.

Tebal agi sida nya napatka sekeda jematan lalu bisi mega bekenaka perau bejalaika pengerindu diri nginti ngambi bulih mayuh asil.

Nambahka nya, mayuh sida dipeda sebelah tebing sungai enggau jematan ti nyambungka rumah ba genturung pendiau dia bejalaika pengawa nginti.

Sungai Tellian ngembuan pengulih besai dikemansang nyadi siti ari produk dagang temuai datai nemuai kia seraya nyepi pemanis isi undang galah idup ti ulih ginti.

Ukai naka nya aja, Sungai Tellian mega tebilang enggau ai ti beresi ti bechura chelum mirah sereta ulih dikemansang nyadi palan dikena matak raban orang ti rindu ba pengawa nginti sekalika peranak dia tauka ari luar Mukah.

MUSIN UNDANG NYARU

Siku orang ti suah nginti ba Sungai Tellian, Germanies Akou madah, diatu benung musin undang galah enggau bemacham ikan sungai.

Nya alai, Sungai Tellian engkeman nyadi palan endur nginti.

Iya mega madah, undang ti diulih ba sungai nya bebida ari endur bukai laban ai Sungai Tellian chukup beresi sereta nadai ngembuan utai kamah ti ulih ngeruga pemeresi sungai nya.

“Pia mega, rega undang tu ba Mukah ditu tau dikumbai murah laban dijual ngena rega RM60 nyentuk RM80 sekilogram enti dibanding ba endur bukai.

“Ba endur bukai, undang tu dijual enggau rega entara RM100 nyentuk RM150 sekilogram bepanggai ba pemesai undang galah tu,” terang iya.

JEREKI NAMBAH

Ku Germanies, nengah asil pemadu manah ti diulih ba Sungai Tellian nya ulih nyungkak penatai pemisi enggau tikas idup ngagai peranak Mukah.

Kelimpah ari pengawa nginti ngulihka asil sungai, sida mega ulih nyendiaka servis nyuwa perau dikena nginti enggau ke bukai ngagai bala pengusung ti datai kia.

Ari nya tadi, mensia mayuh ti ngembuan pengerindu ba pengawa nginti diperansang datai ngagai Pelilih Mukah enggau Kampung Tellian dia empu.

Bala pengusung ke datai kia endang diperansang ngiga nalan ti engkeman endur nginti sereta nyuwa perau ari peranak dia dikena nyukung dagang sida.