KUCHING: Pengawa ngaga jematan lambung ba simpang Batu 8, Jalai Penrissen ditu udah masuk proses langkar tengkebang tumu, pemendar taba enggau nyiri perunding, ku Kaban Kunsil Nengeri (ADUN) Batu Kitang, Datuk Lo Khere Chiang.
Iya madah ke projek nya dipelaba beungkus RM480 juta lalu penembu projek nya deka mutar penanggul jalai alun sekut.
“Naka diatu, projek tu agi ba renggat ngemendar taba enggau langkar tengkebang. Perunding apin dichiri tang dalam proses.
“Perunding deka nyendiaka langkar tengkebang berapa bulan da agi,” ku iya lebuh dirandau pemberita pengudah ngabas taba ngaga parit di Batu 9, Jalai Kuching-Serian, ditu kemari.
Taja pia, Khere Chiang enda ulih nentuka kemaya projek nya ulih belabuh dipejalai tang iya meri jamin penanggul jalai alun sekut ulih diputar pengudah jematan lambung nya tembu.
Nambah ke nya, iya meri terima kasih ngagai Menteri Kereja Raya, Datuk Seri Alexander Nanta Linggi ti udah ngemendar agih belanja ngemujur projek nya.
