Bau enggau Serian pelilih menua baru dirampit Covid-19

KUCHING: Pelilih Bau enggau Serian entara pelilih menua baru ke ngerikod kes baru kena rampit penyakit Covid-19.

Komiti Penyangga Penusah Ngenyit Nengeri Sarawak (JPBNS) nerang, Sarawak ari semilan kes baru positif Covid-19 ke diripot sehari tu tiga kes nya ari Bau, dua kes bela ari Kuching, Samarahan enggau Serian lalu pelilih bukai nadai ngerikodka kes baru.

Sehari tu mega, bisi siti agi kes ngaul staf perubat Kuching ngujungka bisi 57 iku staf pengerai Kuching ditukuka positif Covid-19.

Bisi 22 iku ari sida nya datai ari Kluster Kuching Conference seraya 35 iku nya ari leman tauka kluster mit.

Pia mega, bisi 19 kes suman dirikodka enggau udah pansut ari sepital ke alai semua 19 kes nya ari Sepital Besai Sarawak (SGH).

Bisi 172 kes baru Pesakit Dipelaba Kena Rampit (PUI) dirikodka kemari enggau 178 kes agi nganti pemutus makmal.

Bekaul Atur Tagang Pejalai (PKP) ba Sarawak, mensia mayuh udah nitihka 97.3 peratus PKP di menua tu enggau piak polis udah nangkap 33 iku ketegal ngereja penyalah ngelanggar PKP.

Kenyau ari PKP dipejalai berengkah ari 18 March tu tadi, bisi 1, 987 iku udah ditangkap enggau 1,363 iku udah dituduh ba kort.

Nambahka nya, bisi 494 Pesakit Agi Dipatau baru udah rejister ba hotel seraya 146 udah tembu bejalaika timpuh ngurung diri enggau dikemendar pulai ke rumah sida.

Pia mega, JBBNS madah di Sarawak naka tu bisi tujuh bengkah leman penyakit ke udah dikelala iya nya Kuching Conference, Seri Petaling, PUI Itali, Leman-leman mit, Sporadik kes enggau Agi Dalam Pansik sereta Kes baru.