Bayar renggat keterubah udah dibayar, adu lengkas sekula repuk

BATU KAWA: Perintah Sarawak udah mayar pulai renggat keterubah duit pinjau RM1 bilion dikena ngaduka sekula repuk di nengeri tu ke beungkus RM 350 juta.

Kepala Menteri Sarawak Datuk Patinggi Abang Johari Tun Openg madah Perintah besai patut ngerumban pengawa ngaga sekula repuk di nengeri tu.

“Kami udah nitihka atur ke dipinta sida lalu pekara tu kira udah mujur.

“Nya alai aku ngarapka sida ngerumban pengawa ngaduka sekula repuk, laban enti enda pia sida tau dikumbai bula,” ku iya.

Abang Johari mansutka jaku nya lebuh bejadika Gempung Parti Sarawak (GPS) Zon 2 di Dewan Serbaguna Kampung Semeba, Batu Kitang ditu, tadi.

Nangkan nya ku iya, pengawa ngemanahka sereta ngadu baru sekula repuk tu pekara ti pemadu beguna ngagai nembiak di Sarawak.

“Anak kitai patut ngembuan palan belajar ti nyamai sereta lantang.

“Tu nyadi siti ari pekara ti dibai sereta dipejalaika kami ba GPS ba tanah kenyalang tu,” ku iya.

Apin lama ti udah, Menteri Wang Lim Guan Eng madah Perintah Besai deka ngerumban pengawa ngemanah sereta ngaduka sekula repuk enti perintah Sarawak mayar RM350 juta dikena ngaga projek renggat keterubah sekula repuk.

‘SARAWAK FIRST’… (Ari Kiba) Ketuai GPS Zon 2 ti mega nyadi Presiden SUPP Datuk Dr Sim Kui Hian, Abang Johari enggau Sapit Kepala Menteri Datuk Amar Douglas Uggah Embas ngitauka menira GPS seraya nyadaka lagu GPS ba pengerami bejadika GPS Zon 2 di Dewan Serbaguna Kampung Semeba, tadi.