NEW DELHI: Sebuah sekula ba Assam, India bejalaika chara ke enda kala dikereja orang bukai pengudah ngasuh nembiak mai butul plastik ungkup bebayar ba sekula.
Chara nya dikena ngurangka uras plastik ti majak nambah ba serata dunya.
Raban politik ari Nagaland bekunsi video pasal sebuah sekula ti kurang benasip manah semina nerima plastik dikena bebayar ba sekula.
Nitihka penerang, tiap minggu nembiak dipinta mai 23 butul plastik ngagai sekula.
Sekula nya dipungkal Parmita Sharma enggau Mazin Mukhtar ba taun 2016 pengudah sida ngelala bisi dua isu besai nating sekula iya nya penanggul uras enggau penanggul buta urup.
Dikena mutarka isu nya, sida numbuh sebuah sekula ke alai nembiak ulih belajar pechuma enti ngumpul butul plastik tiap minggu.
Plastik ti digumpul nya dikena nyadika kereban tambah baka nambahka batu bata enggau ngaga jalai alun enggau agu.
Nya alai, mensia mayuh ti meda video nya berasai temegah laban inisiatif sekula nya ulih ngerandang jalai nuju pelajar ti ngintu pemeruan rampa menua.
