SIBU: Bazar Ramadan Sibu di Dataran Tun Tuanku Bujang Fasa II nyelai ari taun ke udah.
Ku Sapit Menteri Pelajar, Inovasyen enggau Pemansang Penau, Datuk Dr Annuar Rapaee, bazar sekali tu ngena konsep ‘warung mega’ lebuh bansal nya ditusun manah agi.
Ngena konsep baka nya ku iya, palan nya tampak besai agi endur pengusung bejalai enggau enda besekut.
“Bansal ti nyual bemacham pemakai ba bazar tu diengkah ngelingi endur nya lalu bisi kimis besai ba tengah endur bebuka puasa.
“Ba kimis nya mega bisi disediaka bangku enggau mija endur mensia mayuh buka puasa ditu,” ku iya lebuh ngabas bazar nya, ensanus.
Kaban Kunsil Nengeri (ADUN) Nangka nya madah, konsep nya nyelai ari bazar ke ulu laban udah diubah raban pengatur.
Ku iya, konsep baka nya meri pengelantang lalu bisi perengkaguna bukai udah disedia.
“Nya kebuah, bala pengusung ti deka buka ditu pen ulih, ditu richah enti mayuh sama bebuka puasa,” ku iya.
Nambahka nya, Dr Annuar madah, bisi 108 bansal ba bazar sekali tu.
Ku iya, penyampau nya mayuh dibanding taun ke udah.
Nengah penyampau nya, iya nyemetak madahka peminta bansal nambah lalu raban pengatur nyau bisi tatak nyendiaka bansal nentuka palan nya semampai beresi.
Iya mega minta bala pedaja ngerintaika pemakai ti dijual disempulang enggau rega ngambi bala pengusung nemu rega enggau muntang bebelika pemakai nya.
Dikena nentuka pengelikun enggau kualiti pemakai ti dijual, ku Dr Annuar, raban Opis Pengerai Bagi Menua Sibu enggau raban pengatur deka matau palan nya belama.
“Kami mega deka nyendiaka lumur kompelin ungkup mensia mayuh nengah aplikasyen WhatsApp enti tepedaka bala pedaja nyaga pemeresi enggau pengelikun pemakai ti dijual.
“Raban pengatur deka nyendiaka nya lalu mensia mayuh ulih kompelin dia,” ku iya nyemetak.
Ba pejalai ngabas bazar nya, Dr Annuar udah nyadung ketapu enggau apron ngagai bala pedaja.
Bazar Ramadan Sibu diatur Palan Servis DUN Nangka sereta dipejalai Gerempung Pedaja Sibu enggau Gerempung Pedagang Begulai Sibu.
Sama nyempulang Dr Annuar iya nya kaban Kaunsil Mengeri Sibu (MPS) ti beempu tanggungpengawa nyaga bazar nya, Kaunsilor Syed Hamzah Wan Hamid Edruce enggau Temenggong Datuk Wan Hamid Edruce Tuanku Fauzi.
