Palan pesaka asal berengkah nerima temuai 8 April tu
BAU: Palan Pesaka Asal Bung Bratak (BBHC) deka nerima penatai mensia mayuh berengkah ari 8 April tu.
Chairman Gerempung Pesaka Asal Bung Bratak Datuk Peter Minos madah ungkus dikena ngaga semua perengka guna dikemisi ba Bung Bratak manggai RM10 juta.
“Opis Menteri Dagang Temuai enggau Main Asal Perintah Besai udah ngagihka belanja penyampau RM8 juta dikena ngaga BBHC tu.
“Seraya Perintah Nengeri Sarawak nengah Opis Kereja Raya meri belanja RM1 juta dikena ngaga jalai bukit nuju BBHC sereta palan paking kerita,” ku Minos.
Iya mansutka jaku nya rambau aum pengarang berita ba rumah Baruk, Bung Bratak, kemari.
Ku Minos, palan tu deka matak mayuh temuai ari dalam enggau luar menua tu datai ke BBHC kitu.
“BBHC tu siti palan ti strategik laban palan tu semak enggau palan nemuai ke bukai ti bisi ba menua tu.
“Ba BBHC tu mega bisi dua rumah panjai lama Bidayuh lalu siti ari rumah panjai nya ngangkatka nama Pandelela Rinong, digelar Rumah Panjai Pandelela Rinong,” ku Minos.
Kebuah pia, Pandelela tu siku ari bansa Bidayuh ti datai ari menua nya lalu iya bisi meri seikar tanah ke diatu endur sida ngaga paking kerita.
Nambahka nya, BBHC semina ulih nerima enda lebih ari 50 iku temuai sekali nemuai.
“BBHC tu ngembuan 13 pintu bilik ti bisi empat tauka lapan katil dalam sepintu bilik.
“Mayuh pengawa ulih diatur sereta peneleba ulih diasai bala temuai ti nemuai kitu baka meda rampa menua asal, mandi ai panas dikumbai Ayak, ai wong, niti andau buluh sereta mayuh ke bukai,” ku iya.
