KAPIT: Penyikar raban Balai Bomba enggau Penyah Penusah (BBP) Kapit gawa sekali agi tebantai lebuh sida mujur nyelamatka siku nembiak indu ari tepekul ba rumah panjai di Sungai Sibau, Jalai Bukit Goram ditu, malam tadi.
Nembiak Sekula Sekondari (SMK) Kapit 2 nya napi peresa Sijil Pelajaran Malaysia (SPM) sehari tu, tepekul pengudah jalai pansut ari rumah panjai sida ampuh empat kaki penalam.
Pengari Palan Ngatur Operasyen Bomba Sarawak madah, kangau pasal penusah diterima pukul 10.34 malam tadi, ari siku pengajar SMK Kapit 2 ti minta bantu mai nembiak nya ke buding sekula.
“Lapan raban bomba, betuai ke PBK II KUP Budiman Salbia, berumban ngesah kin ngena kereban LFRT, entukar EMRS, entukar 4WD, enggau bot fiber enggi Komiti Penyangga Penusah Nengeri Sarawak (JBPNS), Opis Pelilih Kapit,” ku iya nengah sebengkah penerang.
Raban bomba udah nya mupuk napatka rumah panjai urung empat kilometer (km) penyauh ari balai.
Taja ai ngampuhka kandang ngelingi endur nya, tang agi ulih dijaga laban rumah panjai betiang tinggi, enggau takah ai ari geladak urung tujuh kaki.
Ngena bot fiber, raban bomba mujur mai nembiak nya ngelayang ai bah sebedau dianjung ke buding indu SMK Kapit 2 lalu tudah likun datai sereta diserah ngagai warden buding urung pukul 11 malam.
“Operasyen tembu pukul 11.20 malam pengudah raban bomba nentuka nembiak nya likun datai enggau sedia napi peresa pagi tadi.
“Kami mega matau gaya bah di rumah panjai nya, ke alai naka operasyen diatur, agi ulih bejaga,” ku pengari nya.
