BCF ngelaku Sibu nyapai status mengeri besai

SIBU: Perintah nengeri ngembuan juluk deka ngangkatka status mengeri Sibu nyadi sebuah mengeri besai di nengeri tu.

Kepala Menteri Datuk Patinggi Abang Johari Tun Abang Openg madah, nya alai nengah pengawa ngatur Pengerami Main Asal Borneo (BCF) endang nyadi siti ari program ke ulih dikena ngelakuka Sibu nyapai juluk nya.

Ngelansa pekara nya maya bejadika BCF Edisi Ke-16 2019 ba Dataran Tun Tuanku Bujang ditu malam ensana, iya madah perintah nengeri deka terus nyukung pengerami nya.

“Tu chukup manah dikena ngemansangka Sibu enggau kandang menua besemak. Semua program tu ulih dikena ngelakuka Sibu nyadi sebuah mengeri bepengerami enggau mayuh main asal.

“Nya alai, kitai deka nempa Sibu ari mengeri ngagai status mengeri besai,” ku iya nengah teks ke dibacha Menteri Muda Pelajar enggau Pansik Teknologi Dr Annuar Rapa’ee ti ngarika iya ba pengerami nya.

ADAT KITAI…Dr Annuar (baris dua, tengah) begambar kenang ba ‘Itut’ iya nya sebengkah main asal bansa Melanau.

Sama datai Chairman Komiti Besai BCF 2019 Rogayah Jamain, Kaban Kunsil Nengeri (ADUN) Dudong Datuk Tiong Thai King, Pemesai Pelilih Sibu Suhaili Mohammed sereta raban pemesai ke bukai.

Iya madah, perintah nengeri mega deka nentuk mayuh agi temuai dalam menua tu datai ke Sibu maya BCF lalu semampai nyukung program nya.

BCF, ku iya udah manggai renggat ke-16 lalu pengerami nya ukai semina ngangkatka Sibu ba kar dagang temuai entarabangsa tang mega nama Sarawak kelimpah nyungkak penatai pemisi rayat.

Iya madah, BCF mega endang pengerami dikena nyerakupka mensia mayuh ari luar awakka nanggam kaum enggau peranak Sibu.

Pia mega, BCF bejalaika tanggungpengawa rama dikena ngaul rayat ditu enggau temuai luar.

“BCF endang chara dikena kitai belajar, berati, nyikap enggau ngerembaika main asal kitai.

“Diatu, mayuh aktiviti mandangka pemakai, mandangka main asal enggau adat bisi dibantai ke pemaik rayat ditu empu,” ku Abang Johari.

“BCF meri awak ke manah dikena ngelakuka Sibu ngagai rayat ditu enggau temuai luar,” ku iya.

Pengerami ninting taun diatur Kaunsil Mengeri Sibu (MPS) nya diatur berengkah 18 ngagai 27 Julai tu ba Dataran Tun Tuanku Bujang bisi mantaika mayuh main asal, seni enggau adat kelimpah pemakai asal pupu bansa di Sarawak.

Beserimbai enggau pengerami tu mega, MPS deka ngatur Pengerami Tanda Entarabansa Sibu dikena meri awak ngagai sida ke nembiak belajar sereta bebasaka adat ke bisi di Sarawak.