SYLVESTER RIANG
Suarasarawak.news@gmail.com

KUCHING: Meri perati maya belajar sereta bebasa ke pengajar nyadi kunchi penyulut siku nembiak Sekula Sekondari (SMK) Kanowit, Maximus Mathew ba peresa Sijil Pelajaran Malaysia (SPM) 2024.

Iya madah ke diri balat tekenyit enggau enda nyangka tau bulih pemutus 8A, 1B ba peresa nya.

“Aku chukup gaga, gagit enggau temegah lebuh bulih pemutus ti nyulut tu taja pen aku nyelinting 9A sebedau tu.

“Aku udah ngaga pemadu manah ungkup manggai ba tikas tu.

“Ngena peluang tu, aku meri terima kasih ngagai Tuhan, bala pengajar, apai indai enggau bakih ti udah mantu aku nyapai penyulut tu.

“Tu ukai penyulut aku kediri aja tang tu penyulut kitai begulai,” terang iya.

Tampung Maximus, enti deka nyulut ba pelajar, kitai meseti meri perati maya belajar sereta bebasa ke bala pengajar kelimpah pintar magi awak diri belajar.

“Dalam sehari, aku nyendia awak abis nadai tiga jam dikena belajar.

“Pengudah tu, aku masang juluk deka nampung pelajar di Universiti Teknologi MARA (UiTM) ngambi Kus Asasi TESL,” ku iya.