KOTA SAMARAHAN: Pemerintahan Medan Timur Tentera Darat (PMTTD) patut nanggam kaul ti manah enggau menua serantau dikena nyaga pengelantang enggau pemaik menua ari keruga luar.
Panglima Medan Timur Tentera Darat, Leftenan Jeneral Datuk Mohd Sofi Mohd Lepi, nyemetak madah soldadu darat deka bulih pemaik asil ari kerejasama nya.
Ku iya, kerejasama ti manah enggau diplomasi meseti ditambah ngambi awak enggau peluang semampai tebuka dikena nyerungkai kerejasama baru seraya nyaup nentuka pengelikun enggau pengelantang ba dua wilayah tu enda dikeruga.
“Penau enggau penyikap deka terus ditambah dikena mantu menua sebarang maya.
“Kerejasama enggau ejensi bukai deka ditegap nengah chara ‘Whole Of Government and Whole Of Society’ (WOGOS) ngambi nyukung strategi penyaga menua,” ku iya bejaku ba Pengawa Ngelancharka 10 Taun PMTTD di Markas PMTTD ditu, kemari.
Sama datai, Panglima 1 Divisyen, Mejar Jeneral Datuk Mohamed Fauzi Kamis, enggau Panglima 5 Divisyen Sabah, Mejar Jeneral Datuk Malek Razak Sulaiman.
Nambahka nya, Sofi madah, PMTTD meseti ngembuan sereta nunjuk kredibiliti pemadu manah kelebih agi ngagai rayat ba dua wilayah tu.
“Nya kebuah, semua raban Medan Timur meseti ngangkatka pemereti diri enggau muai pekara ti ulih ngamahka nama soldadu darat.
“Pengelandik enggau penau intelektual raban ba bemacham pekara enggau pengelandik meseti ditambah,” terang iya.
Iya madah baru, pemansang semua renggat nya endang diberi perati enggau dikemerat.
Ku iya, inovasyen enggau pengawa ngena teknologi pemadu baru ti likun deka nambah pengasi pengawa ngaga pemutus ba bemacham renggat pemerintah.






