SIMANGGANG: Berebak ari lori tangki ti diempu Serikat Billion Special Sdn Bhd ti pantis ngujung ke jalai sepanjai enam kilometer ba mua Opis Kereja Raya (JKR) Bagi Menua Sri Aman penuh enggau minyak.
Tuai Bomba enggau Penyah Penusah (BBP) Zon Tiga Sri Aman, Muhammad Rais Adham Rosalan madahka sida nerima ripot bekaul pekara nya urung pukul 10.17 pagi.
“Lebuh Tim Alfa datai ba palan nya, sida tetemu ke bisi penyadi minyak naya ba jalai dia berebak ari lori tangki Serikat Billion Special Sdn Bhd ti pantis,” ku iya ditu, tadi.
Terang iya, tim nya ti betuai ke PBK II Mohd Fadhli Buyong bejalaika pengawa meresa lalu tetemu ke bisi penyadi minyak naya ba palan nya urung enam kilometer penyauh.
“Kitai nadai bejalaika sebarang operasyen tang semina matau pengelikun penguna ti betengah ke jalai alun nya.
“Taja pia, kitai udah ngerah raban serikat nya bejalaika pengawa meresi lengkas minyak ti naya nya,” ku iya.
Iya bela ngenuku nadai sebarang penudah aksiden diripotka nyadi lalu operasyen nya diketu pukul 12.01 tengah hari.
