Bejimat pulai ke menua, mayuh jalai empai likun – Gira

“Agi mayuh endur ba jalai tu belubang, betiku, mayuh perengka pengangkut, bedebu kelimpah bisi mega kereban dikena ngaga jalai agi mengkang dia.”

SIBU: Mensia mayuh ti nengah jalai Pan Borneo maya mulai kediri ngagai menua nyambut Gawai Dayak ti deka datai ditangkan bela bejimat.

Kaban Kunsil Nengeri (Adun) Tamin Christopher Gira Sambang madah, agi mayuh endur sepemanjai jalai nya empai likun ditengah.

“Semua kitai bela gagit mulai kediri ke menua maya diatu tang anang enda bejimat sereta ngira pengelikun diri sebilik maya nengah jalai Pan Borneo.

“Agi mayuh endur ba jalai tu belubang, betiku, mayuh perengka pengangkut, bedebu kelimpah bisi mega kereban dikena ngaga jalai agi mengkang dia.

Christopher Gira Sambang

“Nya alai, bejimat maya nengah jalai tu,” pia ku iya madah, kemari.

Gira madah, naka tu jalai nya mega agi benung digaga alai mensia mayuh bela bejimat sereta anang kelalu laju mai kerita.

“Pia mega enti berasai lelak tauka ngantuk manah belelak dulu tisi jalai.

“Anang guai majakka pejalai laban kitai ukai semina ngira diri empu aja tang kira diri sebilik ke dibai,” ku iya madah baru.

Kelimpah ari nya, Gira madah, jalai besai nyangka majak sekut ukai semina bala mayuh pulai ke menua tang mega diatu benung kemisi sekula enggau Hari Raya bela deka diintu nyauka berebak enggau Gawai Dayak.

“Besampi ke pemujur pejalai kitai laban diatu perengka pengangkut di jalai alun majak nambah nyerumba kemisi enggau Hari Raya kelimpah ari Gawai Dayak,” ku iya madah.

Ngena awak tu mega, Gira ngarika sida sebilik ngenataika pengaga ati ngintu Gawai Dayak ngagai semua bansa Iban enggau Hari Raya ngagai sida ke nyambut hari besai nya.