BINTULU: Mensia mayuh di Pelilih Bintulu dilalau enda baban bebelika utai diguna laban bekal endang semampai chukup.
Ketuai Opis Menteri Dagang Dalam Menua enggau Pekara Bebelika Barang (KPDNHEP) Pampang Bintulu Nazari Hassan madah, tu berindik ari utai diguna ninting hari ba Bintulu chukup ungkup mensia mayuh kelebih agi sepemanjai Atur Nagang Pejalai (PKP) tu dipejalai.
“KPDNHEP endang seruran beratika utai diguna ninting hari tu chukup baka gula, berau, minyak makai, tepung, pemakai dalam tin, minyak binjin enggau diesel sereta ke bukai chukup ke mensia mayuh,” ku iya madah ngagai pemberita ditu, kemari.
Iya madah, opis sida endang semampai bejalai matau ngagai kedai dikena nentuka utai diguna ninting hari nya semampai bisi.
Nambah nya, Nazari madah sekumbang PKP dipejalai kenyau ari 18 Mac suba, sida nadai nerima ripot ari mensia mayuh pasal suntuk bekal utai diguna.
“Kami semina bisi ninga mensia mayuh sebanaka sengkabung enggau hand sanitizer nadai dijual tauka abis,” ku iya.
Ngena awak nya mega iya meri puji ngagai pemanah kerejasama ti udah diberi bala pedagang enggau penguna sekumbang sida bejalaka pengawa kelebih agi maya PKP tu.
