MIRI: Kerejasama rat entara apai indai, raban kolej enggau nembiak beguna amat nentuka penyulut pelajar sereta nempa pengereja landik ti ulih tetangkup ke peminta industri kemaya hari.
Datuk Bandar Majlis Bandaraya Miri ti mega Kaban Kunsil Nengeri (ADUN) Pujut, Adam Yii Siew Sang madah, graduet pelajar vokasional ngesan pangku pengawa besai nangkup peminta industri.
Ku iya, penyulut semina ulih dijapai lebuh bisi kerejasama rat entara apai indai, pengelicha, nembiak sereta raban industri.
“Lebuh semua raban begempung, kitai ukai semina ulih nempa graduet ti bisi penemu enggau pengelandik tang mega ulih nyikap rebak biak sedia napi pemar dunya kereja sereta nyungkak pemansang ekonomi menua,” ku iya.
Iya madah munyi nya rambau bejadi Aum Besai Ninting Taun PIBG, Pengerami Anugerah Akademik Sesi 1/2025 sereta Hari Betemu Apai Indai enggau Pengajar 2026 ti diatur ba Balai Permata, Kolej Vokasional Miri kena Hari Enam.
Tampung iya, program ti ngempuru tiga agenda besai nya nyadi siti pelasar ti besai reti laban ulih ngerapit kaul kerejasama entara raban kolej enggau apai indai dikena nempa penyulut nembiak.
Nambah ke nya, Adam Yii madah, mengeri Miri bisi mayuh peluang gawa kelebih agi ba sektor minyak enggau gas, kilang, servis sereta industri teknikal ti begunaka pengereja landik.
“Nya alai, bala nembiak meseti ngena peluang pelajar ti dikemisi dikena nguasa pengelandik ti relevan enggau peminta industri ngambi sida ulih besemekih enggau bulih penuduk dalam makit kereja,” ku iya. – EDISI UKAS
