Belajar ari Youtube dataika landik beranyam

KUCHING: Bai ati rindu meda orang bejual bakul sebelah pasar, ngasuh Regina Inti Ramli, 32 taun, gagit belajarka chara nganyam bakul ari Youtube.

Iya ti siru agi dikangau Gina diatu ngentapka pendiau diri di Miri madah, pengawa beranyamka bakul nya semina dikena ngisi awak lepa aja, udah tembu berintuka pengawa di rumah.

“Pemuas ke meda bakul dijual sebelah tamu enggau pasar, rindang diri lebuh bayam pemanah enggau pengalus asil anyam orang nya tadi.

“Udah nya aku nyau bisi ati deka nguji ngayam kediri, deka meda empa jari diri empu, nyau ngining endar meda keranjai jari bala aya ibuk ke bejual dia.

“Ari nya tadi, aku lalu berunding baka ni ulih belajar beranyam laban ke nadai orang endur betanya.

MAYUH PEMINAT… Kantung sandik dianyam ari tali kutak.

“Dia aku teulihka runding belajar ari Youtube. Terubah endang puas kekusil lebuh ngepunka anyam tang pemuas ke nguji, ka ga nyadi, ulih dikenyadi.

“Ati mesti ka puh taja ati sigi bisi nyida lebuh utai ke dianyam abis salah, belebuh mega teju enda lama dataika bulih runding baru.

“Nama salah rerak. Udah nya pun ke baru, peda baru ga silat jari orang ke beranyam ari video ba Youtube nya tadi.

“Perati lalu tunda baru ajar dataika nemu kelimpah belajar ari pengilap lebuh beranyam,” ku endu Gina lebuh dirandau Suara Sarawak, kemari.

Ku iya, naka pengaga ati tudah diri lebuh mujur nembuka anyam bakul keterubah lalu digambar sereta dikunsi enggau bala mayuh ba media rama.

MACHAM CHURA… Sekeda ari bakul dianyam Regina dijual entara RM15 ngagai RM45 siti.

“Enda nyangka bala ke meda bakul dikunsi aku nya nyau tekait ati dataika sekeda sida madahka diri deka meli, rindu meda asl jari aku ku sida.

“Ari nya tadi, ati aku nyau ransing diri udah nerima jaku peransang sida, bulih runding bejualka bakul nitihka peminta,” ku iya nikalka kenang diri.

Gina madah, rega bakul dijual iya nitihka pemesai enggau pengemar lebuh ke beranyam kelimpah beratika rega makit bakul ke bisi diatu.

“Kitai enda ulih ngeletak rega kelalu mar tauka mudah ari orang bukai, kira nipaka asil keranjai jari kitai, orang ke meli mega deka tepantup ati.

“Ambika chunto, bakul aku nya dijual entara RM15 ngagai RM45 siti nitihka gaya pemesai enggau chura tauka bungai anyam kitai.

RINDU MEDA… Bakul mayuh guna nyengkaum ulih kena mai bekal lebuh nurun gawa.

“Manah agi bungai enggau chura ditipak kitai, rega ulih tinggi agi laban sida ke meli nadai entu ngira rega enti utai nya udah dikerinduka sida,” terang peranak asal Simunjan nya.

Ngelansa pasal pengawa beranyamka bakul, Regina madahka diri ngelama tu begunaka awak urung dua jam endur nembuka siti bakul.

Taja pia ku iya, enti bakul nya besai lalu bungai ke dianyam nya mar, awak lama agi diguna, kala mega manggai dua hari endur tembu.

“Dalam sebulan, aku ulih nganyam lapan iti bakul laban semina beranyam lebuh lepa ari pengawa aja munyika disebut aku dulu tadi.

“Tang enti lebuh nerima mayuh peminta, dia ati aku ransing agi beranyam, kadang tau belipat ari penyampau bakul ke dianyam selama.

MAYUH GUNA… Bakul ditaga endur nyimpan keresa.

“Kebuah pia laban ati gagit meda asil diulih ari keranjai jari diri empu ti dikerindu orang bukai kelimpah ulih mega nambahka belanja kami sebilik,” ku iya seraya tuchum manis.

Ku Gina nambah, bakul dianyam iya laku enggau semampai nerima peminta engka ketegal iya nadai entu beleman lebuh diasuh nganyam bungai tauka chura ti dikedeka sida ke meli.

“Endang baka kitai mensia, makin mayuh orang dikelala, macham mega ulah enggau peminta sida.

“Bisi nya dekaka bakul mit, besai tauka jelan pemesai. Sekeda nya minta digagaka chura terang, buah tikai, bungai moden enggau mayuh ke bukai.

“Aku mega bisi ngaga kantung sandik kitai ke indu dianyam ari tali kutak mega, tau mega dikumbai kitai bakul moden.

“Kebendar, ari utai dipinta sida tu mih ngasuh aku ransing agi ngansah pengelandik diri beranyam, belajarka penemu baru pasal pengawa tu, bepintaka buah tikai ngagai orang ke ngempu.

“Kitai enda tau enda minta pemendar ari orang ke beempu buah tikai nya dikena nyeliahka sebarang saru penemu tauka penanggul dudi hari.

“Tu mega kelai kitai bebasaka orang ke ngempu buah tikai nya laban udah adat kitai bepintaka penemu ba orang ngambi kereja kitai berekat agi,” ku Gina nerang.

Iya mega madah, bemacham chura enggau buah tauka bungai kala dianyam nya lalu dipandang ba Facebook udah matak mayuh agi orang deka meli.

“Ari pemayuh chura enggau bungai bakul dianyam aku nitihka peminta sida nya tadi, bisi sekeda orang nyau rinduka chura enggau bungai ke sebaka lalu minta digaga baka nya.

“Sida lalu betanya pasal rega enggau pengelama aku ulih nembuka anyam bakul baka diinta nya,” ku Regina nerang.

Ngenang pasal dagang tudah diri, iya madah ngena pelasar media rama baka Facebook enggau status WhatsApp ungkup makit enggau ngelakuka produk pengelandik jari nya.

Berebak enggau nya, bala ke bisi ati deka meda enggau nemu silik agi pasal bakul dianyam iya tau ngelawa Facebook Gina Intiey.

Ngena peluang nya, Gina meri besai terima kasih ngagai semua orang ke nadai kala leju nyukung pengawa iya ke bejualka bakul tu.

“Terima kasih ke kita ti udah meli enggau rinduka asil keranjai jari aku tu lalu bepadah ngagai bala bakih ngambi sama meli bakul ari aku.

“Besai amat pengandal aku ulih nyingkang maju agi ba pengawa tu, regas enggau jampat agi beranyam ngambi tetangkup peminta orang ke meli sereta nyungkak ekonomi diri empu.

“Aku mega ngarapka semua sida ke ampit meli bakul nya tepantup ati meda asil lalu enda jera meli bakul ari aku,” ku Regina nyimpul randau.

NGISI AWAK LEPA… Gina nadai nyangka asil keranjai jari diri diterima mensia mayuh.