MIRI: Pustaka Negeri Sarawak (PNS) Miri ngatur bengkel Reading Seeds keterubah di Bario dalam timpuh Atur Tagang Pejalai Penyuman (PKPP).
Nitihka penerang, tuju bengkel nya dikena nerenak chara idup baru bepelasarka Atur Standard Pengawa (SOP) udah ditetap.
Bengkel tu udah nerima sukung tegut ari bala ketuai raban bansa di Bario enggau Kaunsil Mengeri Miri (MBM).
Sepenyampau 15 penyereta ngulu bengkel tu ke alai sida udah dibagi ngagai sekeda tim ngambi ulih belajar enggau meruan sereta nitihka atur takah fizikal.
Kebendar, bengkel tu nagit apai indai ke bisi anak biak ari tiga taun sereta indu ke benung betubuh bisi ke alai kandung sida manggai tujuh ngagai semilan bulan.
Nengah bengkel tu, bala anak ulih ngelala urup ari renggat tumu lalu apai indai meri sukung enggau ngembing bala anak sida dikena munaska penanggul buta urup.
Nambahka nya, apai indai mega diperansang nerenak ulah angkunka pengawa macha ngagai diri sebilik lalu nyadika chunto ngagai bala bukai.
Bengkel tu nampung pejalai Program Born to Read ti diatur PNS kenyau ari taun 2004.
Bisi 12 modul diajar ngagai bala penyereta ti udah dipilih ari renggat antenatal nyentuk umur anak mit manggai 36 bulan.
Ungkup tanya enggau penerang silik pasal inisiatif tu tau telefon nuju lumur 085-422525, tauka anjung nengah e-mel ke Lilian Baun Pulo (lilianbp@sarawak.gov.my) enggau Mohd Khadrie Mohd Ramzie Faizal (khadzrrf@sarawak.gov.my).
