KUCHING: Orang ke bejalaika pengawa ngumpul suwa patut berundingka pengawa meri diskaun ngagai orang ke nyuwa nitihka pengulih sida.

Tu nyengkaum sida ke ngempu tanah, orang ke ngempu kedai, opis, palan bebelika barang, kompeni teksi sereta piak ke bukai bekaul enggau pengawa ngumpul suwa.

Ex-menteri besai ke mega Kaban Parlimen (MP) Pekan Datuk Seri Najib Tun Razak madahka bala penyuwa patut berundingka pengawa meri diskaun 90 peratus ngagai endur ke disuwa tauka enda mayar suwa pemanjai pengerekai igi penyakit Covid-19 tu.

“Piak bank udah ngemendarka bayar pupuk ditangguh pengelama enam bulan.

“Aku meretika sekeda bank agi meri bungai pemanjai timpuh tangguh nya,” ku iya madah ba siti penerang dipansutka iya ba facebook, kemari.

Najib madah, nadai atur undang-undang ti dikena perintah nagang bala penyuwa minta suwa ninting bulan ari sida ke nyuwa tu.

Tang pekara nya mega nadai mai penguntung ngagai dua piak baik nya orang ke nyuwa tauka meri suwa nya empu.

“Nadai penguntung ngagai kita ke meri suwa nya enti sida ke nyuwa nya enda mayar suwa ngagai kita.

“Lebuh penusah tu nyadi, kita nadai ulih tegiga ke orang baru nyuwa endur nya taja kita dah muru orang ke nyuwa nya laban enda tebayarka suwa sida,” ku iya.

Kelimpah ari nya, Najib ngelalau mensia mayuh ngambika bela betulung enggau pangan diri kelebih agi lebuh pengerekai igi penyakit Covid-19 ba menua tu.