Beri pemendar ungkup orang bumai

KUCHING: Komiti Penyangga Penusah Ngenyit Nengeri (JPBN) ngaga pemutus ngemendarka dua iku ba sebuah entukar tauka motosikal ungkup komuniti menua pesisir laban ngira diatu musim ngetau padi.

Chairman JPBN, Datuk Datuk Amar Douglas Uggah Embas madah, sida udah berandau enggau polis ngambi ngelepas sida ti ngereja pengawa nya.

“Diatu musim ngetau padi enggau kami ngemendar dua iku ba sebuah entukar tauka motosikal iya nya dua iku melaki bini.

“Nangkan nya, kami mega ngemendarka servis serikat arus penyambung baka Celcom, Digi, Maxis enggau U Mobile sereta pengari sida ngambi beoperasyen enggau dikumbai servis ti diguna,” ku iya.

Uggah mansutka jaku nya ba aum pemberita Covid-19 ba Wisma Bapa Malaysia, ditu kemari.

Taja pia, Uggah madah semina kedai dipilih aja dikemendar beoperasyen baka disetuju Komiti Komunikasyen enggau Multimedia Malaysia (MCMC) sekumbang timpuh Atur Tagang Pejalai (PKP).

“Pemendar tu dikena nyukung peminta servis arus penyambung penguna baka nukar kad SIM, penanggul bebayarka bil enggau penanggul arus penyambung.

“Taja pia, sida semina ulih beoperasyen ninting Hari Tiga enggau Hari Lima aja berengkah pukul 10 pagi ngagai 4 lemai enggau enda tau lebih ari tiga iku pengereja ti gawa maya nya,” terang Uggah.

Uggah mega madah, serikat nya meseti natak penguna ti begunaka servis sida sereta nyaga takah enggau pangan diri.

“Kedai nya mega meseti meresa pengangat isi enggau ngereja pengawa bejejaga ungkup pengelikun bala penguna enggau pengereja,” tandu iya.

Sama datai ba aum pemberita tu iya nya Menteri Kaunsil Kandang Menua enggau Pengawa Berumah, Datuk Sim Kui Hian.