Besaup kitai ngemansangka menua

SELANGAU:  Taja bebida politik, Perintah Besai enggau Perintah Sarawak deka seruran nanggam rat kaul kerejasama dikena ngemansangka Sarawak dudi hari.

Jaku tu dikenatai Menteri Kereja Raya Baru Bian lebuh ngulu Pengerami Makai Lemai Ngintu Hari Malaysia ba Balai Mayuh Guna Selangau, ditu ensanus.

“Pekara tu semina deka nentuka rayat Sarawak ngasaika pemansang ba menua kitai tu,” ku Baru nerang.

Ku iya, Komiti Khas diberi nama Aum Atur Nengeri (MTNg) Sarawak udah ditumbuh dikena mansik, merambu enggau bejalaika pemansang ba menua tu.

Pia mega, MTNg tu diketuai iya enggau Sapit Kepala Menteri Datuk Amar Douglas Uggah Embas nunjukka pengeran Perintah Besai ba pemansang menua tu.

JAKU PERANSANG… Baru Bian

Kenu ku Baru, kaul kerejasama entara Perintah Besai enggau Perintah Sarawak tu dikearap ulih merambu projek pemansang ke manah agi ngagai rayat.

Kaban Parlimen Selangau ti mega Kaban Kaunsil Nengeri (Adun) Ba’kalalan madahka projek pemansang ungkup rayat enda patut dibalut politik.

Kebuah pia, pekara tu nentuka projek Perintah Besai diperambu lanchar dipejalai ungkup pemaik enggau pengelantang rayat Sarawak seriris enggau Juluk Pengelantang Begulai dibantaika Menteri Besai tu tadi.

Ngelansa pasal Hari Malaysia, Baru ngemerat pemesai guna penyerakup sereta semengat talukka menua kelimpah nerenak ulah intergriti enggau pemereti ari rayat Malaysia enda ngira pupu bansa.

“Rayat Malaysia bebida raban bansa enggau pengarap udah idup lantang enggau beserakup kenyau ari pengawa numbuhka menua Malaysia taun 1963 ari empat nengeri Malaysia, Sarawak, Sabah enggau Singapore taja Singapore ngaga pemutus muai diri ari gempung Malaysia.

“Pengerami Hari Malaysia tu dikearap ulih nerenak penyerakup enggau pangan diri sereta kelai penyerakup rayat,” ku Baru.

“Penyedar enggau penemu pasal pejalai pengawa numbuhka Malaysia patut dikenati ngambi kitai ngenang pemerani aki ini kitai kelia,” ku iya nerang.

Nambahka nya ku iya, bebasa enggau pangan diri taja bebida bansa patut dikemeran ungkup pengelantang semua.

“Nya alai, kitai patut nyeliahka diri ari isu sensitif sereta isu bekaul bansa enggau pengarap dikena nyaga pengelantang enggau penyerakup raban bansa,” terang iya.

“Buai ulah saru penemu enggau penemu luar ke nguji ngelemika penyerakup raban bansa ba menua tu.

“Kitai patut begempung nempa pemujur Malaysia ngambi ulih mansang ngagai tikas dunya,” ku Baru nambah.

Suara Sarawak