Betong disambung jalai meruan agi

Betong: Projek ngaga jalai ti nyambung enam sitak menua ngaul 9km penyauh udah berengkah dipejalai.

Sambung jalai tu napatka menua Ijok, Teguyu, Lempaong, Batu Pesok, Rantau Layang enggau Perdu di Spak ditu ngemai pemaik ngagai peranak di menua nya enggau kandang ngelingi sereta genturung pendiau ti kena pansa jalai.

Renggat keterubah projek tu ngaul Jalai Ijok-Muman enggau 2.6 km penyauh, Rantau Layang ke Lempaong 5.6km.

Tu nyengkaum sambung jalai ngagai enam buah rumah panjai iya nya Rumah Kasa di Ijok Spak, Rumah Nyalau di Nanga Muman Spak, Rumah Uyok di Lempayong Spak, Rumah Kendawang di Rantau Lelayang Spak, Rumah Berundie di Batu Pesok Spak, Betong enggau Rumah Siba di Perdu Spak ditu.

Pengawa nasih tanah kelai ngepunka projek udah dipenyadi Adun Layar Gerald Rentap Jabu dalam pun bulan tu tadi.

BASA… Penatai Gerald diambat bala ke bisi datai ngulu pengawa nasih tanah kelai ngepunka projek ngaga Jalai Ijok, Teguyu, Lempaong, Batu Pesok, Rantau Layang enggau Perdu di Spak ditu.

Ku Gerald, projek tu sebagi ari jalai ti deka nyikap rentayan jalai di Ulu Spak ngelawa Ulu Skrang lalu disadang tembu dalam bulan Jun 2021.

Renggat udah tu deka berengkah ari Perdu ke Lempaong enggau penyauh kesemua manggai 19 km, ku iya.

Kelimpah ari jalai nya, projek ngemanahka jalai belankin ari Nanga Linsom terus ke Ijok mega udah berengkah dipejalai, ku iya nerang silik.

Projek tu udah dikemendar Kaunsil Perambu Nengeri kena 10 Februari 2016 nengah ejensi ngatur pengawa Opis Kereja Raya (JKR).

Kesemua tanah ti kena renchah jalai mega udah dibayar pampas nitihka pematut ari perintah nengeri tu.
Sepenyampau 143 pengempu tanah ari enam buah rumah panjai udah nerima bayar pampas sida empu ti kesemua iya manggai RM3,090,128.20.

ADAT LAMA… Manuk dikena miau piring lebuh nasih tanah ba sebagi ari jalai ti deka digaga nyambung ngagai genturung pendiau di Betong.

 

HAK RAYAT… Sapit Kepala Menteri (duduk, tengah) begambar ungkup kenang begulai enggau penerima chek bayar pampas tanah ti kena renchah jalai ditu apin lama ke udah.

Suara Sarawak