CHINA: Siku lelaki kempang nanchang bini diri ngena besi ba rekung pengelama empat taun ketegal kes bedagangka mensia ba China.

Penguna media rama begau lebuh siku orang tetemuka indu nya ba sebuah langkau dampa ba luar rumah sida ba Xuzhou, Wilayah Jiangsu ba bulan Januari 2022 nyentuk diatu.

Enam iku ti ngaul pengawa bedagangka mensia diukum jil entara lapan nyentuk 13 taun lebuh raban penerit adat tetemuka siku indu dirantai ba sebuah genturung pendiau mit taun nyin kemari.

Saspek ti dikelala ngena nama Dong ti mega laki indu nya, Xiaohuamei diukum ketegal menyati bini iya.

Dong mejal bini iya ngadaka lapan anak lalu lebuh indu nya ngadaka anak ketiga seduai, iya napi penyakit skizofrenia lalu majak raya ngujung iya dipenyati laki diri.

Maya ditemu nya, indu nya diikat ngena rantai besi ba rekung lalu diteju diau ba langkau dampa ti nadai kuasa karan kelimpah diteju lapar.

Indu nya kala dijual ba taun 1998 lalu dibeli siku orang bekebun enggau rega 5,000 yuan (RM3,205) sebedau dijual ngagai dua iku melaki bini ti diatur apai Dong.