BINTULU: Bintulu deka nyadi mengeri keterubah di Sarawak ti ngembuan sistem kerita api nengah langgur pemansang Pan Railway Bintulu nyengkaum jalai Kidurong nyentuk Samalaju.
Premier Sarawak, Datuk Patinggi Tan Sri Abang Johari Tun Openg madah, projek nya sebagi ari langgur timpuh panjai pemansang Bintulu ti mega diseraris enggau langgur rentayan Pan Railway Borneo dudi hari.
“Aku udah berandau enggau Perintah Besai lalu kitai belabuh merambu Pan Railway Bintulu ari Kidurong nyentuk Samalaju.
“Pekara tu udah dipadah ngagai Perintah Besai lalu enti enda ulih dipelanja penuh, kitai deka bejalaika projek tu nengah chara kerejasama.
“Bintulu deka nyadi mengeri keterubah di Sarawak ti bisi kerita api lalu tu deka nyadi sebagi ari Pan Railway ba Borneo,” ku iya.
Abang Johari nyebut jaku nya ba Pengerami Makai Lemai Begulai Enggau Tuai Komuniti serimbai Program Sarawakku Sayang (SKS) Bagi Menua Bintulu 2026, malam kemari.
Nangkan nya, ku iya, pemansang deras ti diasai ke Bintulu sehari tu ukai nyadi tekala nya, tang asil penegap politik, penyerakup pupu bansa sereta kerejasama rat mayuh raban bansa ti nyadi pugu pemansang endur nya nyentuk diaku ba tikas antarabansa.
Ku iya, semangat beserakup entara komuniti menua beguna endar nentuka agenda pemansang sereta transfomasyen ekonomi Bintulu ulih terus dipejalai enggau lanchar.
Bela datai, bala Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof. Dr. Sim Kui Hian, Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nassar, bala Menteri Kabinet Sarawak, Sekretari Perintah Sarawak, Datuk Amar Mohamad Abu Bakar Marzuki, tuai opis sereta temuai dipebasa bukai. – EDISI UKAS
