KUCHING: Sarawak deka mantaika perambu ngambi Indonesia ngena biojisim kampung ba menua sida nengah chara betagang ba pengawa ngasilka kuasa ulih dikemaru dikena ngurang pengawa nunu kampung.
Sapit Menteri Kuasa enggau Pemeruan Rampa Menua, Dr Hazland Abang Hipni madah, nya sebengkah inisiatif timpuh panjai dikena nagang penanggul sebun ti nuntung menua ASEAN nyengkaum Sarawak berebak ari pengawa nunu kampung Indonesia.
Ku iya, opis menteri sida mantai pekara nya ba Aum Komiti Kereja Ekonomi Rama Malaysia-Indonesia (SOSEK MALINDO) Renggat Nengeri Sarawak ti deka diatur enda lama agi.
“Tu entara inisiatif timpuh panjai dikena mutar penanggul sebun. Lebuh Indonesia enda nunu kampung, kayu ti ditebang deka repuk lalu bisi sebengkah sistem ulih ngasilka biojisim dikena ngasilka kuasa (ari sistem nya),” ku iya.
Hazland mansutka jaku nya ba aum pemberita bekaul penanggul sebun ba Sarawak ti diatur ba Begunan Baitulmakmur 1 ditu, ensanus.
Ngelansa silik, iya madah, nengah inisiatif nya, Indonesia ukai semina ulih ngurang pengawa nunu kampung dikena bejalai pengawa betanam betupi tang ulih nambah penatai pemisi baru ngagai menua sida.
Nya kebuah iya deka mantaika perambu nya ngagai SOSEK MALINDO Renggat Nengeri Sarawak bekaul pekara nya ti ulih ngasilka kuasa ulih dikemaru enti dibanding pengawa nunu kampung ti ulih ngamahka angin.
Nya alai, ku iya, Aum Aerosol Asia Ke-13 2024 (AAC Ke-13) ti diatur Gerempung Kualiti Angin Dunya deka diatur ba Kuching ba bulan Ogos 2024.
“Aum tu ila deka meri peluang ngagai Sarawak ngatur aum sereta sesyen randau begulai enggau menua ASEAN bukai bekaul penanggul kualiti angin nyengkaum isu sebun ti nuntung Sarawak,” ku iya.
