KUCHING: Premier Sarawak, Datuk Patinggi Tan Sri Abang Johari Tun Openg madahka bisi undang-undang bukai ungkup bala menteri kelimpah Rang Undang-Undang (RUU) Ombudsman Sarawak 2023 ungkup bala orang gawa perintah.
Iya madah, taja pen menteri enggau sapit menteri dikelaung ari RUU nya tang sida tetap deka dipansik enti bisi bukti mandangka sida ngaul pekara nya.
“Taja pen sida (menteri enggau sapit menteri) dikelaung tang sida agi ulih dipansik ba baruh undang-undang bukai enti bisi bukti mandangka sida meri atur baka nya.
“Nadai siku dikelaung ba pekara tu. Nya kebuah Perintah Sarawak enda takut.
“Kami nyukung perintah ti beresi lalu ukai semina nengah mulut aja tang bejalaika nya nengah atur. Tu meh Perintah Sarawak,” ku iya.
Abang Johari mansutka jaku nya rambau bejadi Hari Integriti 2023 Kaunsil Pemansang Ekonomi Sarawak (SEDC) ba Hotel Riverside Majestic ditu, kemari.
Nya alai, ku iya, undang-undang baru dikemendarka Kunsil Nengeri (DUN) nya nyendia langkar kereja undang-undang dikena matau operasyen perintah.
“Sarawak meh nengeri enggau perintah keterubah ba Malaysia nempa undang-undang ombudsman lalu nya mandangka pengeransing Sarawak narak budaya integriti ba selampur sistem perintah.
“Taja pen nya ditatak ba servis perintah, aku meseti madah kitai ngembuan servis perintah pemadu manah ba Sarawak lalu sida ngembuan integriti ti besai,” ku iya.
Ku iya, integriti beguna amat dikena narak pengandal ati mensia mayuh kelebih agi bala pemeranak puku ti bisi ati deka beranakka puku ba nengeri tu.
