PENGANAN tauka suah disebut kuih penyaram tu sebansa kuih asal ti chukup tebilang ba komuniti di Sarawak mujur dipilih nyadi aktiviti komuniti serimbai Pengawa Bejalai Bebala Mayuh Niti Daun, ti diatur nyerumba Pengerami Ngintu Gawai Dayak Renggat Pelilih Mukah, ditu, kilah ensanus.
Dikelala ngembuan tukuh iya ti segala sereta manis, penganan ukai semina dikerindu pupu bansa tang mega mandangka pengaya pesaka asal kulinari nengeri ti terus dijaga ari rebak siti ke rebak siti.
Dikena ngemujur aktiviti nya, raban Bitara Srikandi udah besaup ngaga penganan nya nengah chara beripai kelai kerejasama enggau semangat beserakup dalam komuniti.
Nitih ke penerang ari Tuai raban Bitara Srikandi nya, Jaidah Bujang, pemutus milih ngaga penganan nya pengudah perambu asal deka mandangka asil anyam manik enda ulih dikemujur ketegal suntuk jam.
“Sebedau tu, kami deka mandangka asil anyam manik tang ketegal suntuk jam, kami setuju milih ngaga penganan.
“Taja pen penemu tu baru, kami endang bisi peneleba ngemujur mayuh aktiviti komuniti sebedau tu ngujungka pengawa besikap lanchar,” terang iya.
Ba pengawa nya, 16 kilogram tepung ti udah dilumai dikena ngaga penganan ungkup mensia mayuh ti datai ngerichah pengerami nya.
Ku Jaidah, bisi 15 iku tukang sumai bela besaup ngaga penganan nya, lalu semua sida mandangka semengat gawa ti ransing sepanjai aktiviti nya diatur.
“Kerejasama ti dipandangka sida chukup ngemantupka ati.
“Alhamdulillah, semua raban komiti meri sukung ti chukup manah, besaup ngereja pengawa sereta nitih ke jaku gerah ti diberi.
“Nadai ulah bepilih bulu ba tim kami.
“Semengat besaup sereta beserakup enggau pangan diri nyadi batang pekara ti nentuka semua pengawa ulih dipejalai enggau lanchar,” tandu iya.
Jaidah madah, pengawa ngelumai tepung penganan udah digaga sehari sebedau program dikena nentuka asil penganan ti digaga manah gamal.
Iya nerang, tepung ti diperam semalam nya ulih meri asil penganan ti manah agi.
“Lebuh tepung ti udah dilumai nya majak kembai, tukuh sereta bungai penganan mega deka ngerembai menyana enggau manah agi dipeda,” ku iya.
Kelimpah ari nya, iya madah pengawa nyendia penganan nya ulih diadu ba timpuh ti pandak berindik ari mayuh agi raban sida endang bisi peneleba ngaga pemakai asal nya.
“Randau enggau kerejasama ti manah ngasuh semua pengawa nyadi muntang laban semua raban komiti nemu tanggungpengawa diri.
“Alhamdulillah, taja pen bisi penanggul sepanjai pengawa ngaga penganan tu, tang semua nya ulih diputar enggau manah berekat kerejasama semua,” ku iya.
Nambah ke nya, timbal ti diterima ari mensia mayuh mega chukup ngemantupka ati lebuh penganan ti disedia dipuji bala pengusung ti bisi datai kia.
Sapit Menteri Pengerai ti mega Kaban Parlimen Mukah, Datuk Hanifah Hajar Taib, ti bisi ngulu pengerami nya, mega datai nyepi penganan ti udah disumai nya.
“Iya madah kediri chukup tepantup ati sereta muji asil penganan disumai kami.
“Pengusung bukai mega meri timbal ti chukup manah pengudah nyepi penganan nya,” ku iya.
Kelimpah ari ngaga penganan, raban sida mega bisi ngias sereta nusun pemakai nya ba atas daun ti udah diadu manah sebedau penatai bala pengusung.
Ku iya, pemujur program nya nyadi peransang ngagai raban sida ngambi terus chakah ngemujur bemacham aktiviti komuniti dudi hari.
“Kami mega ngarap ulih ngemujur enggau ngambi bagi ba program baka tu belama.
“Kelimpah ari ngaga penganan asal, kami mega ngarap ulih mandangka asil anyam manik dudi hari.
“Insya-Allah, kami deka terus ransing nyukung sereta ngulu bemacham program komuniti dikena ngetan pesaka budaya sereta nyempil kaul entara pangan diri,” terang iya.
