BKSS 3.0 beungkus RM300 juta mungkur semua

KUCHING: Perintah Sarawak ngagihka belanja RM300 juta ungkup Pakej Bantu Khas Sarawakku Sayang (BKSS) 3.0 ngambi mantu rayat ti napi penusah ketegal Atur Tagang Pejalai (PKP) pandemik Covid-19 tu.

Kepala Menteri Datuk Patinggi Abang Johari Tun Openg madah, agih belanja nya ari Perintah Sarawak bepun ari BKSS 1.0 enggau BKSS 2.0 .

“Pia mega, agih belanja RM2.55 bilion nengah BKSS 2020 nya datai ari pemansang ekonomi Sarawak.

“Ba BKSS 1.0, kitai ngagihka belanja RM1.15 bilion, BKSS 2.0 iya nya RM1.11 bilion enggau BKSS 3.0 (RM0.30 bilion).

“BKSS 3.0 ngembuan tujuh inisiatif tambah ti inklusif agi ngambi nambahka pengelantang idup rayat ba Sarawak,” terang Abang Johari.

Abang Johari mansutka jaku nya ba aum pemberita khas mantaika BKSS 3.0 ba Wisma Bapa Malaysia kemari lalu pengawa tu mega digulu bala kabinet nengeri.

Ku Abang Johari, inisiatif keterubah iya nya insentif ungkup Ketuai Bilik (KIR) B40 nyengkaum orang bujang beumur 21 taun ke atas begaji RM2,000 ke baruh.

“Lebuh mantaika BKSS 1.0, KIR B40 ba Sarawak ti bepenatai pemisi rm4,000 sebulan enggau ke baruh diberi bantu RM250 pengelama enam bulan.

“Berebak enggau nya, Perintah Sarawak udah nerima mayuh timbal ari KIR ke patut nerima bantu tu tang nama sida nadai dipasuk dalam BKSS 1.0,” terang iya.

Nya kebuah ku iya, Perintah Sarawak meri peluang ngagai KIR ke patut nerima bantu tu ngambi ngapil nengah online tauka nengah Opis Pelilih semak berengkah ari 18 ngagai 28 April tu tadi.

“Nitihka apil nya, aku deka madah, Perintah Sarawak deka nyuaka bantu RM1,500 ngagai 30,000 KIR ti nadai nama di baruh BKSS 1.0 sebedau tu.

“Aku mega deka madah, Perintah Sarawak deka meri bantu sekali terima RM500 ngagai 377,806 orang bujang beumur 21 taun ke atas begaji baruh RM2,000 sebulan,” ku iya.

Terang Abang Johari, inisiatif tu disadang mungkur belanja RM234.0 juta ari Perintah Sarawak