Bonus pemansang ungkup rayat Saratok – Ali Biju

SARATOK: Pekara pengelantang rayat menua pesisir semampai diperatika perintah ti udah dilempai ngemujurka tanggungpengawa nya.

Kaban Parlimen (MP) Saratok, Ali Biju ngemai berita lantang ari Aum Parlimen sekali tu pengudah Menteri Pemansang Kandang Menua Pesisir, Rina Harun madah Projek Nyeleti Jalai Kabo, Krian di Sarawak udah dikemendar.

Ku Ali, lebuh nyaut tanya ari iya, Rina ngenuku projek nya dikemendar di baruh Atur Pemansang Malaysia Lumpar Ke-11 (RMK11), Renggat Pelin 2, Taun 2017 enggau kesemua ungkus manggai RM10 juta.

“Peminta kitai rayat Kabo di Saratok udah mujur dikenatai sereta udah dikemendarka perintah.

“Tu sekeda ari berita chukup manah dibai aku ari Parlimen sekali tu,” ku Ali.

Ali Biju

Nangkan nya ku Ali nibak jaku Rina, skop projek tu iya nya pengawa nyeleti jalai sepanjai 8 kilometer (km).

Status projek tu diatu udah ditinda dalam bulan Januari 2019 lalu dipelaba Surat Setuju Terima (SST) deka dikeluar dalam bulan April taun tu mega.

Dulu ari nya, Ali minta Menteri Pemansang Kandang Menua Pesisir madah kemaya kereja nyeleti Jalai Ulu Kabo deka berengkah digaga rambau atur Aum Parlimen.

Rayat Saratok mega nerima bonus pemansang ku Ali pengudah peminta ngaga Sekula Primari (SK) Abang Leman, Kabong udah dikemendar dalam RMK11.

“Skop projek tu mungkur 30 bilik kelas, 12 unit rumah pengajar, buding ungkup 600 nembiak sereta deka disikap ngena perengka guna bukai.

“Projek tu nyadi projek Opis Menteri Pelajar Malaysia ti dipejalaika Opis Kereja Raya (JKR),” ku Ali nibak jaku Menteri Pelajar Maszlee Malik ba Aum Parlimen tu tadi.