BPHB mantu peranak Uma Bawang

BINTULU: Bintulu Port Holdings Berhad (BPHB) nengah inisiatif Program Tanggungpengawa Rama Korporat (CSR) nyaup komuniti Kayan ti tasah angus berumah.

Raban BPHB nerenak semengat Bintulu Port Prihatin mantu peranak Rumah Panjai Uma Bawang, Sungai Asap ti udah dituntung penusah angus kena 15 April nyin tadi enggau bantu 660 kepin atap zink.

Pengawa nyuaka bantu udah dipenyadi Ketuai Pemesai Eksekutif Raban BPHB Datuk Mohammad Medan Abdullah lalu disua ngagai Maren Uma, Ellision Duren Lihan.

Sama bisi ngemataka pengawa tu Ketuai Pemesai Operasyen Biport Bulkers Sdn Bhd Haji Yusuf Ibrahim, Ketuai Operasyen Samalaju Port Industrial Sdn Bhd Matshalleh Mohd Etli, Menjiar Kanan Servis Korporat Raban ti mega Chairman Program CSR Bintulu Port Pengasih Maslihah Haji Tioh enggau bala pemesai bukai ari Penyangkai Kapal Bintulu sereta peranak rumah panjai nya.

Ku Medan, BPHB chukup siruka komuniti ti begunaka bantu kelebih agi raban dtuntung penusah ngenyit baka penusah angus ditapi peranak Uma Bawang ngujungka sida dia lenyau endur diau sereta reta tengkira.

Nya kebuah sehari pengudah penusah nya nyadi ku iya, BPHB berumban nganjung bantu ngenyit nyengkaum perengka diguna baka gari, ai irup, berau, pemakai enggau bantu mata duit ngagai sida serumah.

Iya mega ngarapka nengah program CSR tu ulih nempa pemanah kaul kelimpah ngemai bal staf sedarka tanggungpengawa rama mantu bala komuniti sereta nyaga nama serikat sida.

SAMA BESAUP… Medan nyuaka bantu BPHB ngagai Ellision di baruh program CSR Bintulu Port Prihatin.

 

ALBUM… Medan begambar ungkup kenang begulai enggau komuniti Kayan Uma Bawang, Sungai Asap enggau bala staf BPHB.