SERIAN: Pengawa Ngiling Tikai besai reti nyadi lambang nutup Pengerami Gawai Dayak ba komuniti Iban di Sarawak lalu nyadi pelasar negap penyerakup, ngerapit kaul sereta negap raban parti ba renggat baruh.
Menteri ba Opis Premier Sarawak, Datuk Seri John Sikie Tayai madah, Ngiling Tikai suah diatur ba pengujung bulan June pengudah ngintu Pengerami Gawai Dayak, lalu pulai ngagai pengawa ti dikereja kitai belama kelebih agi sida ti gawa ba mengeri.
“Pengudah Gawai tembu, tebal agi mensia mayuh deka gawa baru enggau ngereja pengawa ngelama tu. Lebuh bisi awak begempuru baru, program Ngiling Tikai deka diatur kelai nutup pengerami Gawai ungkup taun nya,” ku iya.
Sikie nibar jaku nya lebuh bejadi Program Malam Solidariti Makai Lemai enggau Ngiling Tikai 2026 ti diatur Serakup Indu Parti Rayat Sarawak (PRS) Kunsil Nengeri (DUN) Balai Ringin ba Dewan Chung Hua Serian, malam kemari ti richah enggau penatai urung 1,650 temuai.
Pengerami nya mega nyadi pelasar beguna negut kaul penyerakup renggat baruh sereta ngerapitka kaul entara tuai enggau komuniti menua nya, kelebih agi di sitak Balai Ringin.
Tuai Serakup Indu PRS Balai Ringin, Helen Jimbai ti mega tuai pengatur program madah, batang tuju program nya diatur dikena negap penyerakup, ngerapit kaul sereta nyaga pesaka budaya komuniti Iban ngambi majak ditampung rebak dudi.
Nangkan nya, Kaban Kunsil Nengeri (ADUN) Balai Ringin, Datuk Snowdan Lawan meri besai terima kasih ngagai semua kaban PRS enggau bala bukai ke sukung ngagai program nya ti dipeda mandangka penyerakup enggau peneguh raban parti ba renggat baruh.
Iya mega meri tabi puji ngagai Sikie laban dichiri nyadi Presiden baru PRS sereta ngenang jasa tuai ti dulu nyengkaum niang Tan Sri James Jemut Masing enggau Datuk Sri Joseph Salang Gandum, ti udah nempa penuduk parti nya nyadi tegap.
Ku Snowdan, PRS andal ulih ngetanka semua 11 penuduk Kunsil Nengeri (DUN) ba Pengawa Bepilih Nengeri ke deka datai nyema semua raban parti majak ngetan penyerakup enggau semangat gawa nyadi siti tim.
Iya nyemetak madah, sitak Balai Ringin mengkang bepegai ba prinsip Teguh, Tegap, Tegas dan Taat (4T) ti nyadi pugu pengering organisasyen enggau penaluk ngagai parti.
Nya alai, program tu ukai semina nutup Gawai, tang mega nyadi pelasar ngempu komuniti, negap organisasyen PRS sereta nyaga pesaka budaya nengah pengawa mereti ke tradisyen komuniti Iban di Sarawak.
Bela datai nyukung program iya nya Tuai Indu PRS ti mega Kaban Parlimen Sri Aman, Datuk Seri Doris Sophia Brodie, Kaban Parlimen Lubok Antu, Roy Angau Gingkoi sereta Sekretari Politik Premier Sarawak, Susan Clement Ingun. – SF
