KUALA LUMPUR: Sebatang buluh engka dipeda baka utai tumbuh bukai, tang ba orang ti landik ba tunjuk jari, buluh ulih nyadi kereban enggau ramu berumah ti chukup berega.
Menteri Kereja Raya, Datuk Seri Alexander Nanta Linggi madah, produk buluh bisi pengulih ngerandang peluang ekonomi baru ngagai pekebun mit, komuniti Orang Asli enggau peranak menua pesisir.
Ku iya, pengulih nya mih ti deka diangkat nengah BAMBUild ’26: The Future of Sustainable Bamboo Construction serimbai International Construction Week (ICW) 2026.
“Ari sebatang buluh tu kitai ulih ngaga mayuh macham produk ti chukup berega nyengkaum ramu enggau kereban ungkup sektor pengawa berumah menua.
“Tu ulih ngeransang peluang ekonomi baru ngagai komuniti kitai kelebih agi bala pekebun mit, komuniti Orang Asli sereta peranak di menua pesisir.
“Pengulih tu mih ti deka diangkatka kitai nengah BAMBUild ’26: The Future of Sustainable Bamboo Construction ti dipenyadika aku ba MITEC, Kuala Lumpur ditu, serimbai ICW 2026,” ku iya lebuh bejaku ba mua mayuh rambau pengawa nya.
Nanta madah baru, ba sektor pengawa berumah, bulih bisi pengulih besai nyadi ramu berumah alternatif ti meruan enggau bekal ulih dikeandal.
Iya madah, pemansang teknologi baka engineered bamboo ngasuh utai tumbuh nya ulih dikena ba mayuh pengawa, ari resort eko enggau pavilion ngagai mayuh macham langkar tukuh ti inovatif agi.
“Ari pengawa ngintu, nyaga enggau gaya langkar tukuh ti engkeman, buluh bisi pengulih nyadi sebagi ari pemutar sektor berumah mimit karbon ti teguh enggau bisi rega komersial.
“Taja pia, ba pengawa kitai nyukung inovasyen, pekara ngaul pengelikun struktur enggau nyawa rayat enda patut diteju pia aja.
“Nya alai, aku minta raban Opis Kereja Raya (JKR) enggau Kaunsil Pemansang Industri Berumah Malaysia (CIDB) ngaduka malin teknikal kemas agi.
“Aku mega udah minta raban tu ngemansangka langkar gawa ti nyamin kualiti rentayan bekal begulai enggau FRIM, MTIB, SIRIM enggau raban ejensi bekaul. “Tu nyengkaum pengawa nyerenih setipikit ti patut, tuku ari injinir profesional sereta ngasika standard pengelikun,” terang iya.
Nanta madah, tuju kitai nyata iya nya dikena mantu industri buluh ngerembai ti tau dikena rayat enggau menua beambi ulih ba penguntung enggau peluang ti disedia.
Iya nyemetak madah, tuju nya mega dikena ngangkatka Malaysia nyadi palan malin pengawa berumah ngena buluh meruan di ASEAN.
