SIBU: Bisi 264 iku ba sitak tu udah nerima Gazet Rizab Komunal Bumiputera Seksyen 6 enggau Surat Pala Tanah Seksyen 18 Kanun Tanah Sarawak ke mungkur 22,483.22 hektar pemesai tanah Hak Adat Bumiputera (NCR).

Sapit Premier Sarawak, Datuk Amar Awang Tengah Ali Hasan madah, tu ngelai pengeransing Perintah Sarawak ngerumban pengawa nyukat tanah rayat Bumiputera.

Iya madah, pengawa nya diatur enggau betandu bepelasarka undang-undang.

“Tu digaga kitai betandu lalu ukai maya pengawa bepilih aja.

“Program tu digaga ninting taun alai macham pengawa digaga dikena nentuka tanah NCR ulih disukat,” pia ku iya.

Iya bejaku munyi nya maya pengawa nyua dokumen nya enggau Chek Pampas Tanah Sitak Sibu ditu, Hari Empat.

Ari penyampau nya, 106 iku nerima Gazet Rizab Komunal Bumiputera Seksyen 6 ke mungkur tanah 21,942.13 hektar pemesai lalu 158 nerima Surat Pala Tanah Seksyen 18 ungkup 541.09 hektar pemesai tanah.

Chek pampas RM12.69 juta bela disua ngagai 165 penerima ke beempu tanah dikena ngaga lima iti projek pemansang ba Sitak Sibu.

Madah enggau nyemetak, ku Datuk Amar Awang Tengah, Perintah Sarawak mega semampai beratika peminta nyukat tanah NCR ke endang nitih undang-undang.

Ku iya, taja pengawa nyukat tanah NCR udah digaga kenyau ari 1960-an suba, pemesai tanah ke udah disukat nyentuk taun 2010 semina urung 260,000 hektar aja.

Taja pia iya madah, udah taun 2010 nyentuk ke diatu, lebih 1.2 juta hektar tanah NCR udah disukat ari semua pemesai lebih tiga juta ke udah ditentuka deka disukat.

Ari penyampau nya, semak 1.9 juta hektar udah digazet.

Bela datai ba pengawa nya, Sapit Menteri Pelajar, Inovasyen enggau Pemansang Pengelandik Datuk Dr Annuar Rapaee, Residen Sitak Sibu Superi Awang Said sereta bala pemesai ke bukai. — EDISI UKAS