TUSUN KETERUBAH
BULUH Engkalat tauka nama saintifik iya, Schizostachyum latifolium Gamble mega disebut Buluh Suling tauka disebut Fluting Bamboo.
Buluh Engkalat tu sebansa buluh diameter mit lalu tumbuh ngelansar ba tebing sungai enggau tanah setengah basah.
Ba komuniti Iban di Nanga Tekalit, Pelilih Tatau, buluh tu dikena nyadi produk anyam ari kelia kelebih agi dikena ngaga kedapi tauka jagan (bamboo sieve) ti suah diselat ngena kereban bukai baka wi, senggang, kerupuk enggau bemban.
Kereban buluh nya ukai semina mayuh tumbuh ba Nanga Tekalit tang dipilih laban engkeman kelebih agi tan basah, nyamai dilentur lalu mudah diraut enggau dibila mipis sereta nyamai dianyam.
Serak tu, kitai deka ngenang lenak pasal Buluh Engkalat ti dikemansang komuniti Iban ba Nanga Tekalit.
The Kraf Bagiau – Sustainability of Engkalat Bamboo Craft in Nanga Tekalit, Tatau, Bintulu tu sebagi ari inisiatif nengah Program Negap Komuniti Universiti Perintah (Komuniti@UniMADANI) Renggat Kedua ti dipelanja Opis Menteri Pekara Wang Malaysia lalu dikemujur Palan Pemeruan Universiti, Universiti Malaysia Sarawak (UNIMAS).
Projek tu dikemujur Dr Ringah Kanyan ti nyadi Tuai tauka Semiotics and Symbolism Expert, Associate Professor Dr Faridah Sahari ti mega Industrial Material Expert, Dr Mohd Najib Abdullah Sani ti mega Product Design Expert, Dr Nur Auni Ugong ti mega Heritage Expert enggau Dr Daniel Ugih Echoh ti mega Regional Development Expert sereta Dr Emmanuel Osakue ti mega Arts and Crafts Expert.
NYAUP KOMUNITI
Lebuh ngerandau Dr Ringah Kanyan, iya madah ke projek tu bepun ari perati iya ba fenomena rural-urban migration ba lima komuniti rumah panjai enggau genturung pendiau di Nanga Tekalit, Tatau.
“Bala indai mayuh nitih laki enggau anak ke mengeri baka di Tatau, Bintulu enggau Miri lalu sekeda gawa tauka semina pindah ngarau ngagai mengeri laban nyaga anak besekula.
“Enti nadai kereja, bala indai tu nadai batang pengawa bukai. Mayuh sida landik ngaga produk pengelandik jari tang pengelandik nya enda dikena nyungkak ekonomi diri sebilik.
“Tambah mega, komuniti ba Nanga Tekalit udah jarang endar ngemeran pengawa bumai taun tauka bekebun enggau nupi jelu.
“Mayuh jam semina tebasau nadai ngereja pengawa ti tau mansutka asil enggau meri penguntung.
“Ari nya tadi, aku nyau berasai dikangau lalu meseti meri pulai tauka pemaik nyadi raban akademik enggau pemansut nyaup komuniti.
“Aku engka enda ulih nyaup ngena duit ringgit tang semina ulih nyaup ari sukut meri sanding penemu enggau muka runding bala komuniti ngambi ulih ngansah pengelandik jari ti tau nambah penatai pemisi enggau nyungkak ekonomi ruang bilik,”ku Dr Ringah.
Ari nya, Dr Ringah ngempuru raban akademik enggau pemansik ari dua fakulti di UNIMAS nyengkaum Fakulti Seni Gunaan dan Kreatif (FSGK) enggau Fakulti Sains Sosial dan Kemanusiaan (FSSK) ngambi sama berundingka strategik inisiatif ti engkeman dikena nyaup komuniti di Nanga Tekalit.
KRAFBAGIAU
Terang iya, raban pemansik UNIMAS udah berati ke pengelandik jari enggau kereban asal ti udah bisi di Nanga Tekalit.
“Pengelebih Nanga Tekalit tu iya nya buluh Engkalat ti ditemu ngembuan seribu macham guna dikena ngaga produk pengelandik jari.
“Kebuah pia laban buluh Engkalat tu mayuh tumbuh ditu sereta buluh mega ditemu ngembuan mayuh guna ari jeman kelia nyentuk diatu.
“Baka ditemu kitai, buluh tu mayuh guna laban tan lama, tan basah, teguh enggau enda mudah retai ngapa.
“Nya kebuah, buluh Engkalat tu manah dikena produk anyam enggau produk pengelandik jari bukai.
“Enti bala penguna meli produk buluh Engkalat ari Nanga Tekalit tu mega enda lebu laban ditemu sigi tan lama,” ku iya seraya madah ke projek tu belabuh dipejalai 1 Julai 2024 nyentuk 31 Disember 2024 lalu udah dilanjar nyentuk 31 March tu tadi.
Iya madah ke projek tu mujur enggau nyapai tuju sereta udah ditutup kena 15 April 2025 lebuh dipenyadi Menteri ba Opis Premier Sarawak, Datuk Seri John Sikie Tayai.
Dr Ringah madah, bisi 40 komuniti tauka artisan berejister enggau program tu udah dikelala lalu nitih kategori tikas pengelandik enggau basa kereja pengelandik jari digaga sida.
Ngenang silik, iya madah ke Program Komuniti@UniMADANI Renggat Kedua tu mega udah nyendia siti mesin pemelah enggau pengeraut buluh dikena nentuka pengawa komuniti efsiyen sereta angkun nyungkak pengelandik diri.
Iya mega madah ke bala pemansik udah nyaup komuniti Nanga Tekalit ngaga chap dagang tauka disebut branding ba produk pengelandik jari digaga sida.
Berindik ari nya, lambang KrafBagiau udah dipilih nyadi label produk pengelandik jari asil komuniti di Nanga Tekalit.
Nya alai, Dr Ringah madah ke lambang KrafBagiau ukai semina dikena bejualka produk ti digaga ari buluh Engkalat tang mega dikena ungkup bemacham produk pengelandik bukai ti digaga komuniti Nanga Tekalit.
TUJU
Nama kini tuju bejalaika projek ngaul komuniti di Nanga Tekalit tu?
Dr Ringah madah ke bisi tiga tuju ngemujur projek tu baka ngemansang artisan lokal, nempa rentayan makit ungkup produk pengelandik jari ti meruan sereta ngemeran pengawa ngetau buluh enggau atur ti meruan.
Tuju kesatu, ngemansang artisan lokal tu nyengkaum meri latih dikena ngemansang komuniti ba pengelandik jari bepelasarka buluh Engkalat.
Ku Dr Ringah, tu mega mantu nyungkak pemansang penemu enggau peneleba ba pengelandik jari diumbaka inovatif kontemporari enggau moden.
Tuju kedua, nempa rentayan makit produk pengelandik jari ti meruan ungkup pengawa pengelandik jari asal ari buluh Engkalat baka nempa rentayan entara komuniti lokal enggau makit pelilih menua nengah branding, chap dagang (labelling) sereta ngelaku produk chara online nengah media sosial.
Lalu tuju kepenudi, ngemeran pengawa ngetau tauka ngambi buluh enggau atur ti meruan nyadi kereban tanam asam sereta ngemeran pengelala biodiversiti enggau pengintu ekosistem.
“Tu mih tiga tuju ti dikemansang kami begulai enggau komuniti di Nanga Tekalit,” ku Dr Ringah nerang pandak.
Udah tu, kitai deka ngenang lenak agi rurun pejalai projek tu, perambu bukai enggau baka ni komuniti di Nanga Tekalit bulih pemaik kelebih agi ba pengawa ngelaku produk anyam ari buluh Engkalat.
