Bungan ngibun pesaka Orang Ulu

“Ilu Leto ngenataika pesan nengah lagu ti disada diiring tebah sape enggau tanda asal sida nuju komuniti ti udah nerima mayuh ubah pemansang dalam timpuh 50 taun ke udah.” – Bungan.

KUCHING: Sarawak chukup tebilang diuan pupu bansa nyengkaum bansa majoriti Dayak datai ari raban bansa Iban, Bidayuh enggau Orang Ulu baka Penan, Kayan, Kenyah, Kelabit, Berawan, Beketan, Ukit sereta etnik mit bukai.

Penyelai enggau pengelain dikembuan genap raban bansa tu mega ngangkatka nama Sarawak pegari ngembuan macham main asal enggau adat lama ti agi dikemeran nyentuk diatu.

Nya kebuah raban bansa asal kelebih agi Kenyah selampur menua tu patut berasai temegah ngembuan main asal sereta adat lama ti ditampung ari aki ini sida menya.

Main asal enggau adat tu patut diintu enggau dijaga manah nentuka iya enda deka punas ngapa diseruyut segang pemansang dunya kemaya hari.

PENGAJAR SAPE… Elizabeth Bungan, siku nembiak ti landik enggau ngajar nebah sape.

Elizabeth Bungan Peter digelar Indu Sape ari Sarawak chukup tampak rita jelai nama laban landik nebah sape ngemai nama Malaysia pegari dataika tikas entarabansa.

Bungan tu penakan Kenyah Beketan datai ari Sibu ti rindu enggau angkunka kereban muzik asa bansa Orang Ulu iya nya Sape lalu berengkah ngerembaika pengelandik diri betebahka Sape kenyau ari dua taun ke udah.

“Ada lalu diau ba Kapit sebedau mindah ke Kuching nampung pelajar ba Universiti Malaysia Sarawak (Unimas) ba taun 2010.

“Apai aku bansa Kenyah asal ari Long Atun di Miri seraya indai bansa Beketan ari Kapit,” ku Bungan madahka penatai diri.

Bansa Kenyah tu ku iya, peranak asal Pulau Bornei ti tebal agi diau mendap adap utara Sarawak baka ba kandang menua Baram, Bintulu enggau Sibu.

ORANG LAMA… Bungan begambar enggau siku orang ti landik nebah sape, Mathew Ngau Jau.

Bukitan tauka dikumbai Baketan tu sebagi ari etnik mit diau di Sarawak enggau tanah Kalimantan Timur Indonesia lalu sida tebal agi diau di Bagi Menua Bintulu enggau Sibu.

“Aku udah graduet ari Unimas ngambi pelajar ba Fakulti Ekonomi & Dagang,” ku Bungan.

Pengeran Bungan, ngangkatka muzik asal bansa Kenyah menua tu patut dipuji sereta disukung semua laban pengangkun iya ulih meri peransang ngagai rebak baru sayauka pesaka asal bansa sida.

Iya terubah labuh pengerindu ba muzik asal tu lebuh suah meda tanda asal Kenyah lalu suah dikangau mantaika tanda tu maya bisi pengerami tauka aktiviti main asal.

Ku Bungan, iya chakah ngaul diri ba mayuh macham program ngambi sama ngayanka main asal bansa Kenyah begulai enggau bala bukai.

ILU LETO… Ilu Leto tu jaku bansa Kenyah dikumbai ‘We, Ladies’ tu Band indu ti ngangkatka kereban muzik ngagai tikas entarabansa.

Nambahka nya, iya mega suah dikangau mantaika main asal tu ba sebengkah pengerami ba menua kitai ditu.

Pengerindu iya merindang nengah main asal enda naka tu aja pengudah mujur ngemanjaika singkang diri sereta ngerembaika pengelandik ditampung ngagai rebak baru ngambika pesaka bansa tu seruran bisi dipeda mensia mayuh.

Iya madahka diri berengkah belajar nebah Sape tu ba taun 2019 lalu diajar Jimpau Balan, siku bakih ti sama bansa Kenyah.

“Muzik asal tu patut diajar ngagai rebak baru ngambi sida mega berasai temegah ngayanka main asal tu,” ku iya temegah.

Iya diatu nyereta band sape indu digelar Band Ilu Leto. Band tu datai ari enam indu benama Alena Murang, Rosemary, Munirih, Nurul Syafiqah enggau Tasneem Bolhassan sereta Bungan empu.

Band sida tu suah dikangau merindang betebahka Sape ngagai renggat entarabansa baka Rainforest World Music Festival 2017, Borneo Youth Sape Festival 2017, World Harvest Festival 2017, Taiwan World Music Festival in Taipei 2018, Hengchun Music Festival 2018 enggau Pintung Music Festival 2018.

Pia mega, Bungan empu suah dikangau merindang ba pengerami besai, pengerami rayat enggau funfair mit ba menua kitai ditu kelimpah ari pengerami main asal bukai.

Bungan majak dikelala mensia mayuh ba pengelandik nebah Sape ba mayuh pengerami ukai semina di Sarawak aja tang dataika tikas dunya.

“Aku suah belajar enggau ngansah pengelandik nebah Sape tu ari orang lama ti endang ngembuan penau ba pekara tu. Jari mega meseti lanchat nunda tiun enggau lagu,” ku iya.

“Aku chukup rindu nebah Sape sereta bisi juluk besai amat deka ngangkatka pengelandik tu ngambi dikelala serata dunya.

“Kebuah pia, pengelandik tu patut dikemeran genap nembiak ngambika kitai dikelala laban ngembuan mayuh main asal enggau adat ke patut diintu enggau dijaga manah,” ku iya nampung.

“Aku ngarapka muzik asal kitai tu ulih dibai, diangkat enggau dikelaku sereta dikerindu mensia serata dunya.

“Tim kami berasai temegah laban ulih ngayanka pengelandik nebah Sape ngagai renggat entarabansa lalu mujur diterima bala mayuh sekalika ari menua tu enggau menua luar,” ku Bungan lantang ati.

“Timbal manah amat mandangka kereban muzik patut diangkat enggau nunjukka kereban main asal kitai tu setipak enggau muzik menua bukai ba serata dunya tu,” ku iya nandu.

Ku Bungan, pemujur sida mandangka Sape ngagai renggat entarabansa tu kelai kitai ngingatka penatai asai diri, pesaka aki ini sereta ngangkatka nama bansa.

Raban Ilu Leto tu bekunsi jerita enggau adat lama dikemeran sida lebuh nyadaka lagu diiring tebah Sape enggau kereban muzik bukai.

Ilu Leto ngenataika pesan nengah lagu ti disada enggau tanda asal sida ngagai komuniti ti udah nerima mayuh ubah pemansang dalam timpuh 50 taun ke udah.

Pia mega, iya matak penyereta enggau meransang raban nembiak mit ngambi bela rindu enggau angkunka main asal enggau adat bansa lama Kenyah.

Ba taun 2017, Bungan berengkah ngajar bala nembiak nebah Sape lalu ba taun 2018 iya mindah ngagai mengeri Kuching nyadi siku pengajar Sape.

Bungan diatu mayuh nebah Sape ba menua kitai enggau nyadi siku pengajar maya Woksyop Sape tiga hari berunggu nyerumba RMWF 2019 ti diatur apin lama ke udah.

Woksyop Sape tu ngiri penemu enggau chara betul nebah sape kelimpah ngansah pengelandik ngagai rebak baru ngambi bela rinduka kereban muzik tu.

Woksyop tu nyelinting raban nembiak beumur entara enam ngagai 15 taun laban umur maya tu jampat nangkap utai dipelajar sereta nyamai diseridi enggau diembing, ngasika jaku ajar.

Batang tuju program tu ngambika bala nembiak tauka rebak baru landik nebah Sape sereta berasai temegah ngangkatka Sape ti nyadi kelai bansa Kenyah.

“Nya alai, kelas tu ulih matak nembiak ti rinduka main asal tu ngambi sida tu dikeandal ulih neruska penau enggau pengelandik tu,” ku Bungan madah nyemetak.

Suara Sarawak