KUCHING: Bisi 49 palan di Dun Katibas disediaka servis internet nengah chara interim (sementara) dibaruh inisiaitif Broadband Wireless Access (satellite broadband) nengah Pelin Jalinan Digital Negara (Jendela).
Sapit Menteri Utiliti Enggau Telekomunikasyen l Datuk Liwan Lagang madahka kelimpah ari nya Dun Katibas mega bisi ngembuan 19 buah tiang pemanchar baru 4G dibawah inisiatif Jendela ti benung ba renggat dipejalaika diatu.
“Bungkur 4G di Pelilih Menua Song udah nambah ngagai 32.04 peratus ba renggat keterubah 2022 ari 26.02 peratus ba renggat keempat 2021.
“Penyampau tu dipelabaka deka terus nambah kelebih agi pengudah semua inisiatif Smart enggau Jendela tembu taun baru ari ejensi Kaunsil Multimedia Sarawak (SMA), Komiti Komunikasyen enggau Multimedia Malaysia (MCMC) enggau Kaunsil Ekonomi Digital Sarawak (SDEC),” ku iya.
Liwan bejaku munyi nya nyaut tanya Adun Katibas Lidam Assan ba Aum Dun ditu, kemari.
Ku iya, mayuh inisiatif dipejalaika di baruh Sarawak Linking Urban Rural and Nation (Saluran) ba Dun Katibas mungkur chara pemutar interim sereta atur ngetanka servis internet.
“Chara pemutar interim tu bisi digaga ba empat buah rumah panjai ti ngena servis wifi pechuma iya nya Rumah Guntor Takan Song, Rumah Sidi Nanga Nayai Ulu Katibas, Rumah Lucy Nanga Lanang Tekalit enggau Rumah Api Nanga Terusa, Ulu Katibas nengah teknologi satelit dibaruh inisiatif wifi Saluran.
“Tu enda nyengkaum tiga buah tiang pemanchar 4G tetap ti digaga ba baruh Smart Renggat Keterubah iya nya ba Nanga Lanang enggau Nanga Barok di Tekalit, Song enggau Nanga Banjor, Song,” ku iya.
Iya nangkan nya madahka Jendela Renggat Keterubah digaga ungkup ngemanahka kualiti enggau bungkur telekomunikasyen ba Dun Katibas baka nyeruri 14 buah stesyen pemanchar ari servis 3G naggai 4G.
“Semilan buah stesyen pemanchar tu udah tembu ke alai lima buah tiang pemanchar agi dalam proses dipejalaika ti dipelabaka tembu ba renggat keempat taun 2022.
“Perintah mega ngeluaska bungkur rintai ‘gentian optik’ ti deka meri pemaik ngagai 110 buah premis ti benung dalam proses dipejalaika.
“Ba baruh Smart, 15 buah tiang pemanchar bisi digaga, dua buah tiang pemanchar tu udah tembu lalu laluh 13 tiang pemanchar ti bukai dalam proses benung digaga,” ku iya.
