MUKAH: Opis Menteri Utiliti enggau Telekomunikasyen sereta Sarawak Energy nyapai siti da pemujur dalam Skim Kuasa Karan Menua Pesisir (RES) nengah pengawa ngerembaika grid di Daro.
Inisiatif tu mega nyukung komitmen Perintah Sarawak dikena ngedut takah entara mengeri enggau menua pesisir seraya nyerungkai peluang sosioekonomi lalu ngerembai grid kuasa enggau bekal kuasa karan.
Menteri Utiliti enggau Telekomunikasyen (MUT) Sarawak, Datuk Seri Julaihi Narawi madah, projek RES Renggat Kepenudi Keedua di Batang Lassa nyendiaka bekal kuasa karan ti ulih dipechaya ngagai 464 tuai bilik di 16 genturung pendiau kenyau ari tembu bulan March 2024.
Ku iya, renggat ketiga Batang Lassa Dua deka nyendiaka bekal kuasa karan ngagai 54 tuai bilik ungkup tiga genturung, nyengkaum 27 tuai bilik di Rumah Geruka.
Nangkan nya, Renggat Tiga di Passin mega ku iya, deka ngerembaika bekal kuasa karan ngagai 186 tuai bilik lapan genturung pendiau manggai suku kedua 2026, nentuka bungkur kuasa karan penuh di Daro.
Tambah mega ku iya, pengawa nukar injin api ngagai bekal kuasa karan 24 jam nyukung juluk Sarawak nyapai Nadai Karbon manggai 2050.
“Kitai nempa pemujur besai kenyau ari taun 2009, nambah ke bungkur kuasa karan ari 79 peratus (56 peratus di kandang menua pesisir) ngagai bungkur penuh (99 peratus di kandang menua pesisir) ujung taun 2024,” ku iya.
Julaihi madah munyi nya lebuh bejadika projek betampung grid RES Renggat Kepenudi Ketiga di di Rumah Geruka, Batang Lassa Dua, ditu ensanus.
