SANTUBONG: Palan Penyulut Teknikal Sarawak (CENTEXS) deka diangkat nyadi Palan Akademi CENTEX ba taun baru.
Kepala Menteri, Datuk Patinggi Abang Johari Tun Openg madah, ari pengawa ngangkatka palan pelajar tu deka ngasuh bala pelatih ti mujur ngulihka setipikit nampung pelajar ngagai renggat tinggi nyengkaum master.
“Ba renggat master, latih khas digital bisi disedia laban kitai nagit ekonomi digital manah agi datai ba taun 2022.
“Diatu kitai nambah sekeda perengka guna di CENTEXS (Indu Opis) sebedau diangkat nyadi palan akademi,” ku iya.
Iya mansutka jaku tu ngagai media pengudah Bejadika Kompleks Bersepadu Teknikal, Digital enggau Warisan CENTEXS ditu, kemari.
Foto: Marvin Kudang
Kenu ku Abang Johari, kelimpah Kuching, empat pampang CENTEXS bukai iya nya di Lundu, Betong, Dalat enggau Lawas semina bisi latih ba tikas setipikit aja.
“Nya alai, CENTEX Kuching disikap ngena mayuh makmal enggau kereban khas dikena ngaga pansik.
“Nya kebuah bala penyereta ti mujur bulih setipikit ba empat pampang CENTEXS ulih nampung pelajar sida ba tikas tinggi agi di Kuching,” ku iya nerang.
Ku Abang Johari, perengka guna infrastruktur telekomunikasyen 5G deka dikemansang dikena nyapai juluk nya.
“Ambika chunto, kitai deka mansik penyampau ikan terubok nengah data 5G ti deka disambung ngagai palan pemansik ngambika dipansik raban bepenau.
“Laban penerang 5G tu ngena sensor, nya kebuah muntang agi kitai nemu bansa ikan terubok nyengkaum timpuh ti patut betelu enggau mati,” ku iya.
Sama datai Menteri Kaunsil Kandang Menua enggau Pengawa Berumah Datuk Dr. Sim Kui Hian, Chairman CENTEXS ke nyadi Sekretari Perintah Sarawak, Tan Sri Datuk Amar Mohamad Morshidi Abdul Ghani enggau Menijar Besai Sarawak Multimedia Authority (SMA), Dr Zaidi Razak.
