Cherita rumah panjai Nyalak Atas di Pakan tau bulih nama bepun ari ‘siku ukui nyalak jani atas bukit’

Lebuh agi nyadi kampung puang sereta apin mayuh diuan mensia kelia mayuh kayu ti berega baka tebelian, engkabang enggau nyatu tumbuh ngachir ba menua Nyalak Atas, Pakan.

Kenu ku Mathew anak Brundang, 34 urung taun 1920, bisi siku tuai Iban benama Nyala anak Geligum matak bala iya ari Skrang pindah ke Balut ba sebengkah genturung menua di Entabai,Pakan sebedau berumpang baru lalu ngentapka diri ba rumah panjai ke diatu.

Nama Nyala tu diberi dikena ngingatka nama siku bujang berani tauka tuai pematak kayau iya nya Nyala Geligum empu sebedau ditukar ngagai Nyalak Atas bepun ari penatai siku orang bebansa China ti tilur lalu enda nemu nyebut leka jaku Nyala enggau segala lebuh iya datai ngelawa rumah panjai nya.

Berebak enggau nya mega enda memukai siku ukui ba rumah panjai lalu nyalak siku jani ba atas bukit ti besemak enggai bebadu ti ngujungka sida serumah lalu nempa nama rumah sida enggau ‘Nyalak Atas’ lalu nama nya mengkang dikena nyentuk ke sehari tu.

Rumah panjai Nyalak Atas tu keterubah iya suba semina bisi lima buah pintu bilik aja betampung perabung betuaika anak tuai Nyala empu ke benama Asun enggau pengelama 31 taun berengkah ari taun 1943 nyentuk 1974.

TUSUN Tuai Rumah Nyalak Atas.

Ba taun 1975 niang Asun diganti anak menyadi iya ke lumur dua benama Jarah anak Ajup.

Sekumbang pegai Jarah,penyampau pintu bilik kami serumah bisi nambah laban iya mujur ngempung perabung sida serumah nyentuk ke taun 1980 iya nya lima taun sebedau pengawa nyadi tuai dipangku ipar iya ke benama Janting Anak Demong taun 1981.

Udah nya sekumbang dipegai Janting, kami serumah diansak chakah agi ngereja pengawa betanam betupi nyadika penatai pemisi ruang bilik lalu ari penyakah iya (Janting) maya nyadi ketuai sida serumah bisi mansang mimit ari sukut penatai pemisi ruang bilik diri nyentuk ke iya badu lalu diganti Ading Bayang taun 1990.

Taja seruran betukar,tang pengawa ti manah ke dikemeranka ketuai ti lama sebedau nya mengkang dipejalaika Tuai Rumah (TR) Ading setipak enggau ubah pemansang dunya lalu sekumbang nya iya udah mujur bepinta ke jalai alun penama ngagai rumah panjai sida sebedau ngelengka ke tanggung pengawa disan iya sepengelama 12 taun sebedau Tukang Anak Jarah dichiri nyadika pengempung perabung sida serumah di Nyalak Atas nyentuk kediatu.

Ungkup penemu, Rumah Tukang Jarah, Nyalak Atas tu urung 11 Kilometer penyauh ari Pasar Pakan sereta bisi urung 155 iku peranak rumah panjai enggau penyampau 26 pintu bilik.

Rumah panjai Nyalak Atas seruran nitihka singkang pemansang ke maya hari.

 

Pendiau rumah panjai Nyalak Atas diatu.

 

Mathew Brundang