BAU: Perintah Sarawak nadai perambu niki ke chukai Raban Bekuasa Menua (PBT) tang agi baka selama nitih bayar ba taun 1960.

Sapit Premier Sarawak, Datuk Seri Dr Sim Kui Hian madah, bayar chukai nya enda diubah nyentuk diatu taja ungkus nyendia fasiliti majak nambah.

Taja pia ku iya, Perintah Sarawak deka terus berundingka chara bukai nambah penatai pemisi dikena nangkup belanja nya.

“Enti nitih bayar chukai taun 1960, pedis Perintah Sarawak nanggung semua belanja tu.

“Nya kebuah, Perintah Sarawak ngiga chara nambah penatai pemisi ngambi ulih nyendia semua fasiliti ngagai rayat.

“Nengah penatai pemisi ari pemansut baru, kitai ulih nyaup melanja semua ungkus tu,” terang iya.

Dr Sim ke mega Menteri Pengerai Mensia Mayuh, Pengawa Berumah enggau Perintah Lokal nibar jaku nya pengudah ngemata Pengawa Angkat Sumpah 32 kaban Kaunsil Pelilih Bau (MDB) 2023 – 2025, ditu kemari.

Iya madah, servis PBT ba Sarawak bebida enggau ba Semenanjung Malaysia. Ba Semenanjung Malaysia, ku iya, bisi sekeda sitak nadai PBT baka Kaunsil Pelilih ti nyendiaka servis ngagai komuniti.

“Bebida enggau Sarawak, PBT ba menua tu meri servis pemadu manah ngagai rayat ba semua sitak taja sekeda servis ukai ba baruh bidang kuasa PBT.

“Baka lampu jalai dipatau raban Sesco lalu jalai alun dipatau Opis Kereja Raya (JKR) sereta parit dipatau Opis Parit enggau Entali Ai (DID) Sarawak,” ku iya.

Taja pia ku Dr Sim, semua isu nya dikumbai mensia mayuh ba baruh tanggungpengawa kaunsil menua.

Nya alai ku Dr Sim, semua kaban kaunsil pelilih ngesan tanggungpengawa nyadi ‘terabai komuniti’ Perintah Sarawak kelimpah mantu bejalaika Pelin Strategi Pemansang Pengudah Covid-19 2030 (PCDS 2030) Sarawak.