Chukup mih semina siku tuai rumah

“Enti sida deka nyiri siku agi ketuai ari Parti Pakatan Harapan (PH), nama guna nya?”

KUCHING: Pengawa nyiri siku agi Ketuai Raban Bansa tauka Tuai Rumah di Sarawak siti pekara ti enda patut.

Menteri ba Opis Kepala Menteri (Intergriti enggau Ombudsman) Datuk Talip Zulpilip madah Perintah Besai patut bejalaika pekara nya di Semenanjung Malaysia dulu sebedau mai pekara nya ke Sarawak.

“Kitai ba ditu udah bisi Temenggong, Pemancha, Penghulu enggau Tuai Rumah kediri.

“Enti sida deka nyiri siku agi ketuai ari Parti Pakatan Harapan (PH), nama guna nya?” ku iya nanya nyemetak.

Datuk Talip Zulpilip

Talip madah munyi nya lebuh dirandau Suara Sarawak pengudah Program Randau begulai enggau Menteri (Intergriti enggau Ombudsman) Ketuai Opis enggau CeIo, Opis Kepala Menteri ba sebuah hotel ditu, tadi.

Nangkan nya ku iya, Perintah Besai enda patut ngachau pengawa nyiri Ketuai Raban Bansa di Sarawak.

“Ambika chunto, enti kitai bisi dua pemesai baka Menteri Besai megai menua kitai, tentu menua deka charut,” ku iya nerang.

Iya mega nanya kala tauka enda Sapit Menteri Pemansang Menua Pesisir Sivarasa Rasiah ngagai menua ulu lalu beratika rayat rumah panjai kelebih agi ba Sarawak.

“Kati iya (Sivarasa) ka nemu gaya di Sarawak? Berapa kali iya udah niki ke rumah panjai?

“Tu nunjukka sida (Perintah Besai) ngembuan juluk ti salah,” ku iya nambah.

Sebedau tu, Sivarasa madahka Perintah Besai deka nyiri tuai rumah enggau ketuai raban bansa di Sarawak ari raban Pakatan Harapan (PH).

Taja pia, Sapit Kepala Menteri Datuk Amar Douglas Uggah Embas madah Perintah Besai enda nemu bakani sistem nyiri Tuai Rumah, Ketuai Komuniti enggau Ketuai Raban Bansa di Sarawak nyentukka sida (Perintah Besai) charut penemu.