SERIKIN: Atur ngena pasport ba Kompleks Kastam, Imigresyen, Kuarantin enggau Pengelikun (CIQS) Serikin ti dipelaba berengkah beoperasyen taun 2027 ila enggau Pos Lintas Batas Negara (PLBN) Jagoi Babang, Indonesia meseti sebaka ngambi enda nanggul rayat kededua menua.
Sapit Menteri Pengangkut ti mega Kaban Kunsil Nengeri (ADUN) Tasik Biru, Datuk Henry Harry Jinep madah ke diri andalka langkar enggau gamal CIQS Serikin ti deka digaga nya ila seikas enggau PLBN Jagoi Babang, Indonesia ti udah nyadi sereta berengkah dikena bulan Julai 2023.
“Servis ba kededua menua di pintu adan menua nya meseti sama kelebih agi ngena pasport.
“Nya dikena nentuka pejalai raban temuai, bala penguna sereta pejalai import enggau eksport lebih luas sereta nadai betatak,” ku iya.
Henry bejaku munyi nya lebuh ditanya pemberita rambau nguluka Menteri Pengangkut Datuk Seri Lee Kim Shin ngabas PLBN Jagoi Babang, Indonesia iya nya tiga kilometer ari Pasar Serikin ditu, tadi.
Ku iya, CIQS Serikin nya ila dipelaba ulih ngemuntangka pejalai neresa adan Sarawak enggau Indonesia laban semak agi enti dibanding enggau adan menua bukai.
