SERIKIN: Projek ngaga Kompleks Kastam, Imigresyen, Kuarantin enggau Pengelikun (CIQS) Serikin dipelaba belabuh abis laun taun tu.

Menteri Pengangkut, Datuk Seri Lee Kim Shin madah, pengawa ngelangkar kepenudi palan enggau pemesai 28 hektar nya udah diatur ke alai pengawa tumu mega udah digaga raban bekaul naka diatu.

“Kami ba opis menteri suah ditanya kemaya CIQS Serikin nya digaga, nya alai sehari tu, aku empu ngelawa Pos Lintas Batas Negara (PLBN) Jagoi Babang, Indonesia ngambi meda semua kereban enggau perengkaguna ti bisi ditu.

“Aku ngarapka semua ejensi bekaul ti bisi enggau program sehari tu ngambi chunto enggau nunda semua perengkaguna ti dikena sida (PLBN Jagoi Babang) ditu laban aku meda semua kereban ti dikena ditu chukup baru, moden enggau manah,” ku iya.

Kim Shin bejaku munyi nya lebuh ditanya pemberita pengudah ngabas PLBN Jagoi Babang, Indonesia iya nya tiga kilometer ari Pasar Serikin ditu, tadi.

Ku iya, belanja ti diungkupka ngagai pengawa numbuhka CIQS Serikin penyampau RM50 juta mega udah dikemendarka Perintah Besai.