Dagang ketiau, engkabang nyungkak ekonomi

KUCHING: Minyak ketiau enggau techal engkabang meri untung besai ngagai peranak menua pesisir ti bedagangka produk nya.

Rega minyak ketiau diatu manggai RM500 ngagai RM650 mililiter (ml) seraya techal engkabang RM350 sekilo.

Menteri Muda Perambu Mengeri, Pengatur Tanah enggau Rampa Menua, Datuk Len Talif Salleh madahka asil produk nya ulih nyungkak penatai pemisi bala komuniti ti ngereja nya.

“Produk tu mar rega laban begunaka timpuh enggau mayuh leman pengawa ngaga iya.

“Tambah mega, buah dikena ngaga minyak tu bemusin sereta semina bebuah tiga ngagai enam taun sekali,” ku iya nerang.

KEMANSANG ASIL KAMPUNG… Len Talif ngarika Kepala Menteri ngelancharka Pengawa Bejadi NTFP Sarawak 2019 di Tebing Sungai Kuching ditu, kemari. Gambar NADIM BOKHARI.

Peminta tinggi ari menua Brunei Darussalam enggau pengulih kitai bedagangka produk tu nyadika peransang ngemansangka produk tu jauh agi.

Iya mansutka jaku nya lebuh bejaku ba Pengawa Bejadika Karnival Produk Kampung Ukai Kayu (NTFP) 2019 ba Tebing Sungai Kuching tadi.

Kelimpah ari nya, pedagang menua tu ulih nyual produk minyak ketiau enggau techal engkabang nengah dagang digital ba media rama baka Facebook enggau aplikasyen e-dagang baka Shopee.com.

“Produk minyak ketiau 25ml dijual RM25 ngagai RM40 seraya 100gm ngagai 150gm techal engkabang berega RM15 ngagai RM60.

“Makit digital kemaya hari mega udah ngemuntangka pedagang menua tu bejualka produk sida sereta ulih nyungkak ekonomi enggau nambahka penatai pemisi kelebih agi produk kampung ukai kayu,” ku iya.

Pia mega ku iya, industri daun babas dikena ngubat leman bansa penyakit di Malaysia bisi pengulih besai besemekih enggau menua luar.

Kebuah pia laban Malaysia ngembuan 600 bansa daun babas tau keubat ti dirikod ba kampung menua tu.

“Asil produk daun babas ubat di Malaysia manggai RM4.5 bilion. Nya kebuah Sarawak patut ngerebut peluang nyual produk ari asil kampung ba menua tu,” ku iya nandu.