SIBU: Pengerami Makai Lemai Mantar Gawai Dayak Parti Bansa Dayak Sarawak (PBDS) 2022 udah mujur diatur ba sebengkah palan ti tebilang di Bagi Menua Sibu kilah ensanus.
Beserimbai enggau pengerami nya mega, sebengkah pekit udah digaga dikena ngerichahka agi malam nya enggau ngatur Pekit Kumang Gawai PBDS 2022.
Pekit tu diatur Raban Indu PBDS ti betuaika Susan George sereta dibantu raban Indu PBDS ke bukai.
Ku Susan, pekit tu digaga ukai semina deka ngerami Gawai aja tang mega dikena mandangka ngepan asal enggau ngemekuhka daya idup kitai bansa Dayak kelia menya.
Ba pekit tu, gelar Kumang Gawai PBDS 2022 udah dipenggi Linda Ingka ti datai ari menua Sungai Jih Kanowit.
Linda, 23 taun udah ngemai perais mata duit sepenyampau RM1000 lalu disempulangka trofi enggau mega selampai.
Teulihka gelar Lulong Gawai PBDS 2022 pulai ngagai Sherlingtia Morgan ke beumur 20 taun ari Sungai Sengan, Sibu ti nerima perais RM800 lalu diseretaka enggau trofi enggau mega selampai.
Ungkup pemekit ke bulih gelar Selinggar Matahari ti ngemai pulai perais mata duit RM600, trofi enggau selampai udah diterima Cyrill Ferida Lenny.
Cyrill Ferida ti baru beumur 20 taun ti mega endang asal penatai ari menua Sungai Sengan di Bagi Menua Sibu.
Semua pemegai gelar ba pekit nya malam ensanus mega nerima hamper ti dipelanja CC Beauty Pampang Sibujaya.
Ke penerang, CC Beauty tu endang serikat ke melanja sereta mantu ngemujurka Pekit Kumang Gawai PBDS malam ensanus.
Perais ungkup semua pemenang Pekit Kumang Gawai PBDS udah mujur disuaka Presiden parti tu empu iya nya Bobby William begulai enggau Komiti Pengatur Pekit.
Sama bisi nyempulang Bobby ngulu pengerami tu iya nya Sapit Presiden baka Julius Enchana, Kipli Ayom, Mejar (B) Moses Ripai, Sekretari PBDS Sai Melaka enggau mega bala ketuai ke bukai ti datai ari selampur menua Sarawak.
