KUCHING: Pengerami Gawai Tematu 2024 enggau Pekit Bitanding Dayung Gawea Tematu 2024 renggat ke semilan datai baru.
Chairman Pengatur John Pata James Jumin madah, pengawa tu deka diatur belabuh ari 28 nyentuk 29 June di Balai Mensia Mayuh Kelab Rekreasyen Penguna enggau Pengatur Kampung Tematu.
“Taun tu kami deka mantai ngagai mensia mayuh rambai jaku ‘Jak Ndi Otin, Samah To Kayak Adat Bidoyoh’ ti mai reti ‘Kitai Meseti Begulai Sereta Saum Ati Ngetanka Adat Bidayuh’.
“Program besai bisi diatur rambau nya ila baka Bitanding Dayung Gawea Tematu 2024, Bitanding Sindok Gawea Tematu 2024 enggau Bitanding Onak Dayung Gawea Tematu 2024,” ku iya ba sebengkah penerang media, kemari.
Tandu iya, mensia mayuh dipinta ngelawa Facebook Pengerami Gawai Tematu enggau Bitanding Dayung Gawea Tematu ngulihka pom ke alai peminta tama pekit dibuka belabuh 9 March nyentuk 7 April ti deka datai.
“Champion deka mai pulai perais mata duit, jumpang, bungai, selampai, trofi, hamper enggau setipikit.
“Pemekit mega deka berebut gela Miss Talent, Miss Tourism, Miss Popularity, Miss Photogenic, Miss Best Costume, Miss Best Contemporary Dress enggau Miss Traditional,” ku iya.
John madah, kelimpah bepekit pengerami nya mega bisi ngatur program pemandang, bejual pemakai enggau ai irup sereta aktiviti bukai.
“Aku nesau semua sampal datai ngerami Pengerami Gawai Tematu 2024 enggau Bitanding Dayung Gawea Tematu 2024.
“Penerang silik ulih betanya ngagai aku empu ba lumur (0198259395), Canters (0198744716) tauka Leonora (0168723236),” ku iya.
